Dako ang kompiyansa sa Probinsyal nga Panggamhanan sa Davao del Norte nga makuha na pud niini ang Seal of Good Local Governance (SGLG) karong tuiga gumikan sa maayo nga pagpangandam niini.
Kampante kaayo nga miatubang sa mga national evaluators sila Governor Edwin "Kuya Gov" Jubahib ug nagkadaiyang head sa mga ahensiya sa lokal ug nasyonal nga panggamhanan, sa gipahigayon nga SGLG National Validation sa DavNor Capitol Pavilion.
Gikahimut-an ni National Assessment Team Leader Ms. Jill Bao ang saktong pagpangandam sa Davao del Norte.
"Congratulations for being included among the provincial passers in the entire nation... Nakita nako unsa ka preparado ang Davao del Norte," ngon niya.
Gibida ni Kuya Gov ang mga best practices, mga kabag-ohan ug kalamposan sa iyang administrasyon, sama sa piskal nga reporma, mga programa sa panlawas, edukasyon, panginabuhian, imprastraktura, ug uban pa nga mipakunhod sa kapobrehon ug mipalambo sa lokal nga ekonomiya.
Apil ang nakuha niini nga pinakataas nga "Beyond Compliant Award" sa disaster risk reduction management ug pagkab-ot sa "insurgency-free" Davao del Norte.
"We attained significant milestones in driving economic progress, strengthening the ease of doing business... and in creating more jobs and livelihood opportunities to our people... Our social welfare, healthcare, education, infrastructure, (and other programs) ensure that the marginalized sectors have the voice and are given the equal chances in life," sulti ni Kuya Gov.
Ang SGLG national validation ginapahigayon ngadto sa mga LGUs nga nakapasa sa regional level validation o kadtong ginaingon nga ‘potential passers’ kon dunay dakong posibilidad nga makapasa sa SGLG.
Ang SGLG ang pinakataas nga pasidungog ug pinakaprestihiyosong award nga ginahatag sa Department of Interior and Local Government (DILG) alang sa mga local government units (LGUs) nga mipakita sa pinakamaayong serbisyo publiko, base sa mga balaod ug giya gikan sa nasyonal nga panggamhanan.
Ilawom sa Jubahib administration, nakuha sa Davao del Norte ang 2019 ug 2022 SGLG, sanglit wala nagpahigayon og assessment ang DILG niadtong tuig 2020 ug 2021 tungod sa pandemya.
Writer/Photo: Noel Baguio
