Nagmalahutayon ang duha ka adlaw’ng Learning Development Intervention (LDI) nga Public Service Values Program nga gipartisiparan sa mga kawani sa Probinsyal nga Panggamhanan sa Davao del Norte subay sa pagselebrar sa ika-123 nga Philippine Civil Service Anniversary.

Nanguna ang Civil Service Commission XI isip learning provider ug Provincial Human Resource Management Office (PHRMO) sa pag-organisa sa maong programa diin gi-explikar ni HRDD Supervising Administrative Officer (SAO) Michelle Claridad, MPA, MHRM nga tumong niining masilsil sa mga empleyado ang saktong mga mithing anaa sa usa ka civil servant.

“Yesterday and today we have conducted a learning session on Public Service Values which integrates the values nga dapat i-possess sa atong mga kauban nga civil servants. This is still in celebration of the 123rd Philippine Civil Service Anniversary wherein daghan kaayo ta’g gi-conduct nga mga activities, one of which is the conduct of a learning intervention,” saysay ni HRDD SAO Claridad.

Dugang pa niya nga tungod ang tema sa 123rd Philippine Civil Service Anniversary nakatutok sa Dynamism, mahinungdanong lakang ang pagpahigayon nila sa seminar sanglit magamit nila ang mga Public Service Values sa pagmintenar sa dynamism/pagkamaabtikon, sa paghimo’g desisyon, ug sa pagkab-ot sa indibidwal ug organisasyonal nga kauswagan sa ilang pagsagubang sa mga pagsulay isip civil servants.

“Karong September, atong celebration sa 123rd Philippine Civil Service Anniversary nag-focus ta sa Public Service Values it is because atong theme for this year they have emphasized dynamism wherein atong pagsabot ana permi galihok ug gatrabaho atong mga civil servants despite the challenges nga ilahang ma-experience and because of that, values is very important. Kay kung wala naka-integrate sa atong sistema ang values as public servants, maluya ta - mawala atong pagka-dynamic. Maong gina-emphasize nato nga maski technically inclined atong mga employees, importante kaayo ang values nga naa sa ilaha,” sulti ni HRDD SAO Claridad.

Atol sa maong LDI, adunay singkwenta (50) ka mga piniling partisipante gikan sa nagkadaiyang departamento sa Kapitolyo nga nipartisipar ug gibansay nila Senior Human Resource Specialist Bob Timothy Ibojo gikan sa CSC Field Office - Davao Oriental ug Senior Human Resource Specialist Kristina Corpuz gikan sa CSC Field Office - Davao de Oro.

Writer/Photo: Danica Delight Villanueva