Nakaani og pagdayeg ang Rice-Buying Program ni Governor Edwin "Kuya Gov" Jubahib gikan sa mga opisyales ug miyembro sa Regional Peace and Order Council (RPOC)-XI.
Mismo si Presidential Assistant for Eastern Mindanao Secretary Leo Magno, nga mao sab ang Cabinet Officer for Regional Development and Security (CORDS) sa Davao Region, ang misulti nga maayo ug tama ang pagpatuman ni Kuya Gov sa maong programa.
“If it is part of a bigger program, like what Davao del Norte is doing, at alam naman ng COA ang ginagawa nito, so acceptable ito,” sulti ni Magno, atol sa regular meeting sa RPOC-XI, nga gipangunahan ni RPOC-XI Chair Davao City Mayor Sebastian Duterte.
Gibida ni Kuya Gov ang maong programa nga nakatabang og dako sa mga gagmayng mag-uuma nga apektado sa barato kaayong palit sa mga trader sa humay panahon sa ting-ani.
Butyag sa gobernador nga sa gihimong pagpalit sa probinsya sa P17 hangtud P23 kada kilo sa basa nga palay, napugos ang mga trader sa pag-apas sa presyo nga gihanyag sa probinsya.
“Naumpisahan na namin ito sa Davao de Norte, kung saan PLGU na ang bumibili ng palay ng farmers, through our KAAGAPAY program. Binibili namin ang palay from P17 to P23 per kilo, depende sa variety. Tumutulong pa sa amin ang army at PNP sa drying, kasama ang mga LGUs," sulti ni Kuya Gov.
Gipahayag ni Kuya Gov ang best practice sa Davao del Norte sa dihang nangayo og ideya si Mati City Mayor Michelle Rabat kung pwede ba gamiton sa iyang city government ang calamity funds niini aron pagpalit sa humay aron tabangan ang kabus nga mga mag-uuma.
Sa dayong pagsaka sa presyo sa bugas karon, diin apektado ang bagang hut-ong sa katawhan, gibutyag ni Rabat nga plano sa CLGU Mati nga modeklara og State of Emergency, ug gamiton ang pondo sa calamity fund sa pagpalit sa humay sa mga mag-uuma ug sa pagproseso niini.
Sa katapusan, gipasa sa RPOC-XI ang usa ka resolusyon nga naghangyo sa nasyonal nga panggamhanan aron pag-isyu sa executive order nga magtugot sa mga LGUs aron gamiton ang ilang 20% development fund ug ang ilang 30% Quick Response Fund (QRF) aron pagpalit ug pagproseso sa palay sa mga farmers.
Writer: Noel Baguio
