Dise-otso ka pamilya nga gilangkoban sa 72 ka indibidwal nga anaa karon sa evacuation center human nasunogan, ang gitunolan og hinanaling hinabang sa Probinsyal nga Panggamhanan sa Davao del Norte ubos sa liderato ni Governor Edwin “Kuya Gov” Jubahib, sa Prk 15, Fd. Rd. 9, Tibal-og, Sto. Tomas, niadtong Septyembre 25, 2023.
Gipangunahan ni Provincial Social Welfare and Development Officer Rosalinda Rapista ang pagtunol sa ayuda kauban sa mga personahe sa maong buhatan. Sumala ni Rapista nga ilang gihatag sa mga biktima sa sunog ang mga hinanaling panginahanglanon sama sa kitchen utensils, food packs, sleeping kit, ug family kit. Dugang ni Rapista nga ilang gihimo ang profiling sa mga biktima aron mahatagan og financial assistance nga mobalor P10,000.
“Aduna ta’y 18 nga pamilya nga diin totally damaged ang ilang mga panimalay. Hinanaling instruction ni Kuya Gov, gipadala karon diri ang PSWD Staff para maghatag og immediate needs sama sa bugas, hygiene kit, mga gamit pang-opisina, mga kaldero, kutsara, plato, banig, ug unlan. Ato pud silang gi-profiling karon para makadawat pud sila’g cash assistance, emergency shelter assistance P10,000 para sa mga totally damaged. So, paningkamotan nato ni nga mahatag nato ni dayon,” ingon ni Rapista.
Sa mensahe ni Kuya Gov pinaagi sa iyang representante Executive Assistant Arnel Montero, nagkanayong sa kanunay andam ang opisina sa gobernador nga motabang sa mga nasunogan ug mohatag sa ilang mga batakang panginahanglan.
“Mga kaigsoonan, subo man nga pamalandungon ang nahitabo sa inyoha, di man gyud nato na malikayan sa atong kinabuhi. Mo-undergo man gyud ta’g mga pagsulay, but none the less, in behalf of Kuya Gov Edwin I. Jubahib, amo gyung gipaabot kaninyo ang hinanali nga tabang sa opisina sa atong pinalanggang Kuya Gov Edwin Jubahib,” matud ni Montero.
Nagpaabot sa ilang dakong pasalamat kang Kuya Gov ang mga biktima sa maong sunog, gumikan sa hinanaling tabang nga gitunol kanila.
Nasayran nga gilamoy sa dakong sunog ang mga kabalayan sa 18 ka pamilya nga nahimutang sa Prk. 9, Fd. Rd. 3, niadtong Sabado sa gabie, Septyembre 23, 2023. Sumala sa taho, maglisud na og balik ang mga biktima sa maong yuta gumikan kay dili kini ilaha ug adunay nagpailang tag-iya sa maong luna.
Sa pagkakaron, temporaryong nipuyo sa evacuation center sa lungsod sa Sto. Tomas ang maong mga biktima samtang naghulat sa financial assistance nga ihatag gikan sa Probinsyal nga Panggamhanan aron ilang magamit sa pagtukod sa ilang balay.
Writer/Photo: Nestor Mata, Jr.
