Dul-an 40 ka mga empleyado sa Probinsyal nga Panggamhanan ang gibansay aron mamahimong safety officer sa nagkadaiyang departamento sa kapitolyo, sa VIP Clubhouse, Mankilam, Tagum City, sugod Oktubre 2 hantud 6, 2023.
Sumala ni Provincial Human Resource and Management Officer Edwin Palero, nga buot ni Governor Edwin "Kuya Gov" Jubahib nga mahatag sa mga empleyado sa kapitolyo ang ilang katungod sa hapsay ug luwas nga opisina o lugar trabahoanan.
“Kini nga training mao ang pagbansay ug paghatag og mga knowledge sa atong mga safety officers aron maimplementar nila. Mamonitor pud nila ang safety and health standard sa tagsa-tagsa nila ka departamento. Holistic ang atong approach sa pagpadagan sa atong Human Resource Management. Aduna kitay pagpaningkamot sa mga eksilente nga pagserbisyo sa mga empleyado pinaagi sa pag-improve sa mga system and procedures ug mga pamaagi nga ma-improve nato ang capacity ug competency sa atong mga empleyado. Sa lain nga bahin, ato pung gi-insure ang benefits, welfare, safety ug health sa atong mga empleyado diri sa Provincial Government of Davao del Norte,” sulti ni Palero.
Gibutyag ni Analyn A. Escaro, Supervisor sa Occupational Safety and Health (OSH) Center, nga ang OSH alang sa public sector pinasubay sa Joint Memorandum Circular No. 1 series of 2020 nga gilagdaan sa Civil Service Commission (CSC), Department of Health (DOH) ug Department of Labor and Employment (DOLE).
“Kinahanglan nga mag-train or mag-capacitate kita og mga safety officers, para sila ang mahimong adviser sa mga different establishment dili lang sa mga private establishment kondi kini gi-require pud sa mga government establishment. Kay kinahanglan gayud nga protektahan nato dili lang ang atoang mga kliyente, sama usab sa atong mga kaubanan sa trabaho kinahanglan nato protektahan para malikayan ang mga aksidente ug aron maiwasan magkasakit ang mga empleyado diha sa atoang lugar buhatan,” ingon ni Escaro.
Dugang pamahayag ni Escaro nga mamahimong safety officer sa ilang tagsa-tagsa ka departamento ang mga partisipante nga nihuman sa lima (5) ka adlaw nga Basic Occupational Safety and Health (BOSH) Training. Sila usab ang tahasan nga moimplementar sa tanang mga programa, momugna’g mga programa ug palisiya kabahin sa safety and health.
“After nga mahuman na nila kining atong ginatawag nga 40-Hour Basic Occupational Safety and Health for the government sector, gina-expect pud nga sila na ang mamahimong representative or mamahimong appointed safety and health officers sa mga nagkadaiyang departamento. Dili lang sila magiging safety officer, kinahanglang pud nga sila magiging part sa pag-formulate og mga policies and programs in relation to safety and health,” dugang ni Escaro.
Nanawagan si Escaro sa mga Local Government Units nga nahisakop sa Probinsya sa Davao del Norte sa pakig-alayon kanila aron matuman ang kamandoan nga nakalatid sa JMC No. 1 series of 2020 ug makaangkon og safety and health officer sa ilang tagsa-tagsa ka buhatan.
“Akong giawhag ang mga kaubanan namo diri sa Davao del Norte labi na mga government offices nga moadto lang sa amoang opisina sa Occupational and Health Center, Regional Extension Unit XI or sa Davao Region para makig-partner sa amoa para naa gihapoy ma-train pud sa inyoha nga magiging safety officer pud ninyo, ug kitang tanan maka-comply sa mga requiremets sa atoang JMC No. 1 series of 2020. Ug kitang tanan mahimong maluwas ug mahimsog sa atong pagpanarbaho,” sumala ni Escaro.
Kini nga pagbansay nagtumong sa pagtudlo sa mga partisipante sa batakang kahibalo ug kahanas sa pag-ila sa mga peligro sa kaluwasan, kahimsog, ug kinaiyahan. Kalakip sab ang pagtino sa angay nga mga buhaton sa pagkontrol, pagpatuman sa mga palisiya ug programa sa OSH.
Katambayayong sa Probinsyal nga Panggamhanan sa maong training ang Occupational Safety and Health Center ubos sa Department of Labor and Employment (DOLE).
Writer/Photo: Nestor Mata, Jr.
