Walay puas ang pag-ila sa probinsyal nga panggamhanan sa mga trabahante sa gobyerno nga nahimong katambayayong sa paghatod sa serbisyo sa mga katawhan.

Sa laing hugna sa Gantimpala Agad Award, mokabat sa 141 ka mga awardees ang nidawat sa pasidungog pinaagi sa pagtunol kanila sa sertipiko pinermahan ni Governor Edwin "Kuya Gov" Jubahib.

Pagsalbar sa kinabuhi sa mga Dabaonon atol sa nagkadaiyang rescue operations sa ninglabay'ng sunod-sunod nga mga insidente sa pagbaha, ang gitumbok sa gobernador partikular na ang mga personahe sa Provincial Disaster Risk Reduction Management Office (PDRRMO). Kalakip nga nahimong awardees ang mga indibidwal gumikan sa ilang hago ug kugi aron masungkit sa probinsya ang Gawad Kalasag Award.

Samtang, ang ubang mga awardees nagpakita og maayong ehemplo sa pagpanerbisyo. Nahimong garbo sila sa probinsya human nipasar sa Civil Service Examinations, ingon man ang pag-ambit sa mga abilidad labi na sa natad sa pagpaugnat sa kusog human nga nakigtigi sa nagkadaiyang kompetisyon. Kini maoy mga nakasaysay sa sertipikasyon nga gitunol mismo sa taga-Provincial Human Resource and Management Office duyog sa ubang mga department heads. Gawas sa sertipiko, nakadawat sab ang mga awardees og payong ug mug agi’g pahalipay ni Kuya Gov alang kanila.

"Malipayon kaayo ko nga nakadawat og award. Since birth, karon ra jud ko nakadawat og award sa akong pagtudlo sa mga boxing professional ug amateur. But here in DavNor only, naa koy award. Thank you so much DavNor and Kuya Gov Jubahib," butyag ni Roilo Golez, usa sa mga awardees nga na-assign sa Provincial Sports and Youth Development Office isip Amateur ug Professional boxing coach.

Kini nga pasidungog maoy pamaagi sa Probinsya nga maengganyo ang mga kawani nga mamahimong mas epektibo pa sa ilang pagpangalagad.

Writer/Photos: Maria Lorna P. Tripoli