Giandam na ang mga aktibidad alang sa selebrasyon sa ika-57 nga Araw ng Davao del Norte nga mahitabo karong Hulyo 1 hangtod Hulyo 4. Gipangunahan sa Provincial Tourism Office ang pagplano ug pagpresentar sa nagkalain-laing kalihokan nga gipasiugda sa nagkadaiyang ahensya ug departamento sa probinsya ug siyudad.
Langkoban ang selebrasyon sa traditional civic parade, ang pagpasundayag sa mga lokal nga produkto sa mga booth sa LGUs, ug mga makalingaw nga programa sama sa Kadagayaan Festival Concert, Hataw Sayaw/Hiphop Grand Dance Showdown, Pagkaong Dabaonon, Culinary, Tourism, Arts & Crafts Expo, DavNor Idol Grand Finals, LGU Cultural Performance, ug Fireworks Display.
Matud ni Provincial Tourism Officer Noel Daquioag, ilang gipangandaman ang ihap sa mga partisipante gikan sa nagkadaiyang ahensya aron masiguro nga mahatagan ug igo nga pagkaon nga "pantawid-gutom" human sa parada.
“Atong gibutang didto kadto siya ang allocation per agency. So, naa pud tay mechanism usually for that ang atoang communication for the civic parade. Naa siyay google form ang attendance para mabal-an namo kung pila gyud ang number of attendees per agency,” ingon ni Daquioag.
Human sa parada, usa ka programa ang himuon sa DavNor gym nga pagatambongan ni Department of Tourism Secretary Maria Esperanza Christina Garcia Frasco. Ang kasaulogan adunay temang "57th year of People-Centered and Unified Davao del Norte," nga nagpalig-on sa saad sa gobyerno nga padayon nga magmatinud-anon ug masaligan alang sa katawhan.
Si Acting Governor De Carlo "Oyo" Uy, kauban ang provincial government, nagpakita sa ilang hingpit nga suporta ug pag-andam alang sa kalihokan, nga magpakita sa panaghiusa ug pagtinabangay sa tanang lokalidad.
Ang preparatory meeting sa selebrasyon gitambongan nila Acting Provincial Administrator Dennis Dean Castillo, Tagum City Tourism, Arts and Culture Council, Inc. (TCTACCI) President Alma Uy, mga department heads sa kapitolyo, mga representante gikan sa Davao del Norte Provincial Police Office (DNPPO), Armed Forces of the Philippines, Bureau of Fire Protection, civic organizations, ug uban pa, niadtong Hunyo 25, 2024, sa Bulwagan ng Karunungan, Provincial Capitol.
Writer: Maria Lorna P. Tripoli
