Ipadayon ni Acting Governor De Carlo “Oyo” L. Uy ang programang DavNor KAAGAPAY. Kini ang iyang giluwatang pahayag atol sa Provincial Development Council meeting sa Capitol Pavilion, DNSTC, Mankilam, Tagum City, niadtong Hunyo 21, 2024.
Sumala sa acting gobernador nga iyang ipadayon ang implementasyon sa maong programa ilabi na ang vegetable production nga matud pa daghan ang natabangan. Apan aduna lamay gamay’ng kausaban sa ubang aspeto sa maong programa ang himoon aron magmalungtaron ug mapahimuslan sa kadaghanan.
“So, mao na ang nahitabo sa KAAGAPAY Program kay basig matinga mo nga eventually by next year naay moistorya nga gitanggal nato or unsa for that matter. No, wa nato giundang ang programa. It’s just atoa lang siyang gibabaan to doable level. It’s because nasayod gyud baya ang tanan nga ang kwarta nato sa probinsya limited lang,” sulti ni Uy.
Gihataga’g dakong gibug-aton ni Acting Governor Uy ang sektor sa agrikultura pinaagi sa pagdugang pondo sanglit ang probinsya usa man ka agricultural area.
“So, isa na atoa gyung gihatagan og pagtagad karon ang kabahin sa atoang agrikultura. So, nasayod man gyud ang tanan nga ang atoang probinsya basically is an agricultural province gyud. So, mao na nga gi-redirect nato ang other plans and programs gyud padulong sa agrikultura,” matud niya.
Sa laing bahin, hatagan sab dakong pagtagad sa acting governor ang pagbubo og dakong pondo alang sa social services aron ang tanang manginahanglan makadawat sa insaktong tabang.
“Nasayod man pud ang tanan nga usa sa atoang gihatagan og dakong pagtagad isip bise gobernador, nga wherein we make it not just easy accessible but dako ang pondo nato sa social services. Kay ang atoang katawhan dinhi, once gani nanginahanglan og tabang, when it comes naay masakit, naay mamatay, simbako naay maospital, wa gyuy laing kapaingnan kung dili sa atoa gyung gobyerno,” dugang sa acting gov.
Gusto sa batan-ong acting gobernador nga i-develop ug mamahimong income-generating ang 2.3 ektaryang yuta nga gipanag-iyahan sa probinsyal nga panggamhanan nga nahimutang sa BAEX Compound, National Highway, Tagum City.
Nitambong sa maong kalihokan ang mga representante gikan sa national government agencies, local government units, mga department heads sa kapitolyo, Acting Vice Governor Flopone Royle “Popop” A. Catalan, Board Member Orly Amit ug si Samson J. Sanchez, MPA, ang representante ni Congressman Alan Dujali.
Writer: Nestor Mata, Jr.
