Warranty sa butang gipalit, kulang sa timbang ang kasagaran nga reklamo sa mga konsumedor.
Kini ang gibutyag ni Atty Zerline Balleque, Legal Officer sa Department of Trade and Industry (DTI) ug Mr. Renear Mapanao, presidente sa Konsumo Tagum, usa ka pundok sa mga konsumedor labot sa kasagaran nga mulo o reklamo sa mga konsumante sa tibuok Davao del Norte atol sa Kapihan sa Kapitolyo niadtong Huwebes, Oktubre 20,.
“Sa DTI kasagaran gyod ang reklamo ang warranties. For example nagpalit ka ug brand new product pagkahuman pag-abot ug isa ka week naguba. Usahay ang tindahan moingon nga di na na siya pwede mauli. But that’s not what the law states. All brand new consumer products have warranties so dapat naa siya’y warranty, express warranty,” matod ni Atty Balleque.
Sa bahin sab sa Konsumo Tagum, nanguna kanunay ang reklamo labot sa kulang nga timbang.
“Sa amoa, kasagaran complaint nila especially sa Tagum City is number one kanang timbangan. Mao na ang kasagaran nilang reklamo; timbangan sa palengke, timbangan sa Roxas . . permanente na, nga matawag nga perennial problem,” matod ni Renear Mapanao, ang presidente.
Bisan pa man kung ang DTI nang-apod-apod sa mga LGUs sa Davao del Norte ug “calibrated” nga Timbangan ng Bayan, apan padayon gihapon ang reklamo sa mga konsumedor kay migawas nga kulang sa hustong gibug-aton ang ilang gipalit nga mga isda ug ubang pangunang pagkaon gikan sa namaligya.
“Last year nagdistribute ang DTI ug for Tagum, we distributed 8 Timbangan ng Bayan, for Samal we distributed 6, for Panabo we distributed 4. For the other municipalities tigduha. Kauban aning timbangan kadtong among gi-distribute sa una nga price billboard, kay mag-uban man na siya ang Timbangan ug ang price billboard,” dugang ni Atty. Balleque.
Gipasabot sab sa DTI Legal Officer nga human mahatag ang mga Timbangan ng Bayan ngadto sa mga LGUs, ang opisina na sa Tresurero ang adunay responsibilidad lakip na ang regular nga pag-calibrate niini aron pabiling husto gayod ang gibug-aton.
Gipasalig sa DTI ug Konsumo Tagum nga tagdon gayod dayon ang mga reklamo nga moabot sa ilang mga opisina.
Ang tibuok bulan sa Oktubre sa pagsaulog sa consumer welfare month nagdala sa tema: Consumer Protection and Shared Responsibility.
