Adunay TV station na ang Davao del Norte!
Kini human mapirmahan ang Memorandum of Agreement (MOA) tali sa probinsyal nga kagamhanan sa Davao del Norte (PGDN) ug People’s Television Network, Incorporated (PTNI) didto sa Robinsons Tagum Byernes, Oktubre 28 atol sa pagtapos sa kasaulogan sa Press Freedom Month.
Nahimong epektibo ang kasabotan panahon sa pinirmahay ug matapos sa Oktubre 28, 2017 nga mahimong ipadayon sumala sa pag-uyonay sa duha ka partido.
Hinuon dili pa kini makaserbisyo sa publiko ning nahibiling bulan sa tuig 2016 bisan kun gibayran na sa DavNor ang “one-time accreditation” ug ang unang “monthly fee accreditation.” Ipahimutang pa niini ang estasyon ug ang kinahanglanon nga transmitter, tower, ug mga kagamitan sa pagsibya nga anha mahimutang sa DOTC Telof Building, Brgy. Magugpo South, Tagum City.
Ang tanang galastohan abagahon sa probinsyal nga kagamhanan base sa badyet niini lakip ang kuhaon nga mga empleyado ug ang palakaw sa maong estasyon subay sab sa mga palisiya sa PTNI. Lakip nga isibya niini ang “in-house” nga mga programa sa PTNI.
Sa iyang tinguha nga palapdan ang maabot sa iyang sibya, lakip sa mga importanteng gikasabotan nga ilhon gayod sa PTNI nga ang PTV DavNor nga sanga kun “affiliate” ug andam usab kini nga mohatag ug pagbansay sa mga empleyado sa bag-ong estasyon kun panaglit hangyoon sa PGDN.
Ang PTV-DavNor makahimo sab sa pagpangita ug kaugalingong lokal o kaha nasyonal nga mga advertiser nga 100% siya ang magpahimulos sa kita niini.
Hinuon ang katungod dili mahimong ibaligya o kaha i-asayn ngadto sa ikatulong partido nga mahimong ang PTNI ang maykatungod sa pagkanselar niini.
Gilaoman nga sa higayon nga makita ug madungog na sa publiko ang PTV DavNor, gilaoman nga mahimong mapaduol pa gayod ang gobyerno ngadto sa publiko bisan sa hilit nga mga dapit sa Davao del Norte.
