Sa tinguha nga masabtan pag-ayo ang diwa ug unod sa Pederalismo, magpahigayon ang probinsyal nga kagamhanan sa Davao del Norte ug usa ka adlaw nga panaghisgot karong Byernes, Disyembre 9, 2016 sa RDR Gym, Davao del Norte Sports & Tourism Complex.

Ang pagbalhin sa presente nga porma sa kagamhanan ngadto sa Pederalismo maoy tumong sa administrasyon ni Presidente Rodrigo Roa Duterte nga gipanghingusgan karon sa Kongreso alang sa gitinguha ekonomikanhong kalamboan.

Uban sa tema “DavNor Federalism: Are We Ready?” tulo ka mga dagkong ulohan ang pagahisgotan nga naglakip sa ‘Federalism: Concepts and Context’ nga ipasabot ni CHED Commissioner Dr. Prospero “Popoy” De Vera, Professor of Public Administration and Vice President for Public Affairs of the University of the Philippines; ‘Shift to Federalism: The Civil Society Perspective’ nga hisgotan ni Architect Chito R. Gavino III; ug, ‘The Philippine Congress: Its Role in moving Federalism forward’ nga batbaton ni Southern Leyte congressman Roger G. Mercado. Si congressman Mercado mao ang kasamtangang chairman sa Committee on Constitutional Amendments sa ubos Balay Balaoranan sa ika 17 nga Kongreso.

Gawas sa pagpatin-aw sa mga ulohan, ipahigayon sab ang usa ka Open Forum aron gayod masabtan ang mga kalibog ug matin-aw ang mga pagduhaduha gikan sa mga partisipante. Ang mga panelists naglakip kang Speaker of the House Pantaleon Alvarez, Gobernador Anthony del Rosario, Commissioner De Vera, Architect Chito Gavino ug Congressman Mercado.

Gilaoman nga motambong ang tanang Barangay Kapitanes sa 223 ka mga barangay, mga mayor ug bise mayor ingon man ang mga konsehales sa 3 ka syudad ug 8 ka lungsod apil na ang mga piniling opisyales sa probinsyal nga panggamhanan ug mga department heads.  

Atol sa maong kalihokan, pirmahan ni Gobernador Anthony del Rosario ug mga opisyales ang Provincial Government Budget sa Davao del Norte nga naglangkit sa P1.53 bilyones ka pesos alang sa tuig 2017.

Human sa tibuok adlaw nga panaghisgot sa Pederalismo, ang usa ka Fellowship magpa-relaks sa mga delegado.


 

More Davnor Updates at

DavNor Karon

 

DavNor News