Naalarma sa pagsaka sa gidaghanon sa mga natakdan sa Human Immunodeficiency Virus (HIV) nga maoy hinungdan sa Acquired Immune Disease Syndrome kun AIDS, gipasiugdahan sa Provincial Health Office ang AIDS Awareness atol sa Convocation program niadtong Lunes, Disyembre 12.

Ang sakit nga AIDS mao na ang kataposang hugna tungod sa pagtapot sa HIV nga nagpasabot nga ang “immune system” sa usa ka tawo halos tanan nadaot na ug hangtod ning pagsulat wala pa’y nakaplagan garantisadong tambal kontra sa maong sakit.

Matod sa PHO, sa tibuok Pilipinas adunay 48,114 natala nga mga kaso sa AIDS gikan Enero 1984 hangtod Oktubre 2016. Sobra katunga sa maong gidaghanon nag-apektar sa edad 25-34 anyos samtang adunay 10,479 natala nga mga kaso nga naglangkit sa edad 15-24 kun 22%. Ang dakong hinungdan sa pagkaylap sa maong kagaw maoy pinaagi sa Lalaki ngadto sa Lalaki (Male-to-Male) sekswal nga kontak.

Sa Davao del Norte, mitaho ang PHO nga adunay 193 natala nga mga kaso gikan Enero 1984 hangtod Hunyo 2016 diin ang dakong hinungdan mao gihapon ang Male-to-Male sekswal nga kontak nga naglangkit sa 25-34 nga edad sa 107 ka mga kaso. Sa edad 15-24, adunay 70 ka mga kaso nga natala nga natakdan sa HIV nga kagaw.

Gawas sa sekswal nga kontak, mapasa usab ang kagaw nga HIV pinaagi sa pag-abuno ug dugo ug bisan sa gatas sa inahan nga nagpasuso sa anak.

Matod sa guest speaker Dr. Arnel Florendo, City Health Officer sa Tagum City nga hangtod karon namatud-an gihapong epektibo ang “ABCDE” nga pamaagi aron gayod malikayan gayod ang HIV ug AIDS. Kini nagpasabot sa A-Abstinence; B- Be mutually faithful; C- Careful sex/ proper use of condom; D- Don’t shared needles; ug, E- Education/Early Detection.

Giawhag sab sa Tagum City Health Officer nga pakitaan ug kalooy ingon man pagsabot ang mga nataptan sa sakit ug dasigon sila nga magpakonsulta ug mangayo ug tabang pananglit nagtago-tago sa kaulaw.  

Tungod niini namugna ang TAHAS (Tagumeño Against HIV/AIDS) sa katuyoan nga matabangan ang mga nabiktima ug makadawat libreng konsultasyon ug tambag.


 

More Davnor Updates at

DavNor Karon

 

DavNor News