Aron modaghan ug magpabiling himsog ang mga binuhing hayop, mipailawom ang mga mag-uuma sa Davao del Norte ug usa ka adlaw nga pagbansay nga gipasiugdahan sa Provincial Veterinary Office (PVO), Byernes, Disyembre 9.

Sumala sa trainor nga si Dr. Shirley S. Villanueva ug kasamtangang Vice President sa Academic Affairs sa University of Southeastern Philippines (USEP) nga sanglit sa matag lamesa unahon gayod ang karne nga sud-an kay sa gulay ug isda, panahon na nga padaghanon ug bantayan sab ang panglawas sa binuhing kahayopan aron adunay dugang kita.

“Dako kaayo’g tabang sa atong mag-uuma ang pagbuhi ug hayop. Sa tinuod lang pagtan-aw nato sa atong plato. . .  kung naa lang ta choice, adto gyod ta sa karne. . Kabalo ba mo pila ang atong gikaon nga karne sa usa ka tuig?” pangutana ni Dr. Villanueva atubangan sa gatosan ka mga mag-uuma gikan sa lain-laing dapit sa probinsya.

Sa gihatag nga impormasyon sa USEP Veterinarian, nasayran nga nanguna ang karneng baboy nga gustong kaonon sa usa ka Pilipino nga gisundan sa manok, baka, kanding ug karneng karabaw.

“Your interest sa pag-alaga ug baka, kabaw ug kanding is at the right track, eksakto. We have an opportunity nga makahimo’g negosyo basta ato lang siyang maalagaan ug maayo. Dako kaayo ang opportunity,” dugang pasabot ni Dr. Villanueva.

Matod ni Davao del Norte Provincial Veterinarian Officer Dr. Renato Embate nga ang probinsya nagtutok sa animal dispersal diha sa dagko nga mga hayop sama sa baka ug karabaw sanglit namatikdan nga hinay kaayo ang  pagdaghan sa kanding ug manok.

“Among the different commodities, mora’g ang sustainable are cattle and carabao. Though naa pa’y goat pero manok wa na jud. So far sa tanang commodities, naging successful karon ang baka, kabaw kay di man basta-basta mabaligya sa farmers,” pagklaro ni Dr. Embate.

Gawas sa pagtudlo sa pag-atiman sa binuhing hayop, nakadawat sab ug libreng mga produkto nga magamit dayon sa mga mag-uuma sa pagpatambok ug proteksyon sa panglawas sa baka ug karabaw.