Dili lang sa kaulohang Manila ang “Traslacion” sa Black Nazarene, himoon usab kini dinhi sa Tagum City sa pinakaunang higayon.
Kini ang gipahayag ni Fr. Emerson Luego, Kura Paroko sa Sagrado Corazon de Jesus nga mao ang nag-atiman sa itom nga Nazareno sukad sa pag-abot niini sa syudad sa Tagum sa hinapos nga bahin sa miaging tuig.
“Ang pulong nga traslacion gikan kini sa pinulongan nga kastila. Pasabot niini ang pagbalhin sa imahen. . . . Ang Poong Nazareno, he will be transferred to the Parish of Christ the Eucharistic King karong January 8, pahayag ni Fr. Emerson Luego atubangan sa mga sakop sa media.
Dugang gipahayag ni Luego nga andam na ang seguridad alang sa mga debotado nga moapil sa pagbalhin ug ilang gipanghinaut nga mosunod lang ang mga debotado sa himoong kahikayan aron hapsay ang pagbalhin sa imahen.
Ang traslacion kun pagbalhin magsugod alas 5 sa sayong kabuntagon hangtod moabot kini ngadto sa Sagrado Corazon de Jesus nga simbahan didto sa Apokon, Tagum City.
Kini magsubay sa mga dalan Rizal street (nahimutangan sa Christ the King cathedral), Sobrecarey Street, mosubay sa Misa district pagawas sa Pioneer dayon tabok sa Apokon road lahos ngadto sa simbahan sa Sagrado Corazon de Jesus.
Alang sa giya niadtong wala masayod sa lugar, matod ni Luego nga adunay gipahimutang nga mga flaglets gikan sa kanto national highway sa may Jollibee hangtod na padulong sa iyang bag-ong mahimutangan gawas pa sa mga tarpaulin nga gipakatag ubay sa dalan.
Dugang niini, ang dagkong media outlets sa kaulohan nagbandilyo sab sa himoong traslacion ug ang mga pagpahibalo niini pinaagi sa lokal media gihimo usab. Ang mga tarpaulin naka-display sab sa mga lugar sa Davao del Norte ug silingang ComVal Province.
Dugang ni Luego nga ang traslacion sa replica sa Black Nazarene gitugotan nga himoon dinhi sa Tagum aron dili kaayo layo ang mga Mindanao devotees nga moadto pa sa kaulohang Manila.
Gawas sa traslacion, ipahinabo usab sa simbahang Katoliko ang pagsaulog sa Sinulog sa Sto. Niño nga pagahimoon karong Enero 14 diin makita ang nagkalain-laing sayaw sa dalan kun street dancing.
Wala hinuon gigahin nga premyo sa pinakamaayong mosayaw sa dalan alang sa sinulog matod sa mga tig-organisar nga Cofradia del Sto. Niño de Cebu dinhi sa Tagum nga gipangunahan nila Mrs. Amparo D. de Leon ug Mrs. Inday Buchan ug mga kauban.
