Mibalhin na sa bag-ong ‘5 in 1’ nga bilding ang Provincial Agriculture Office (PAGRO) sa Davao del Norte Lunes, Enero 9.

Ang kanhi naglagyo nga Administration section, Crops Management Division, Research Development & Extension Division, Fishery Resource Management Division ug Technical Support & Data Base Management Division sa PAGRO karon gihiusa na sa P8 milyones kantidad 450 metro kwadrado nga estruktura.

Matod ni Provincial Agriculturist Dr. Anastacia Notarte, PhD. nga “katumanan sa damgo” ang haluag nga opisina alang sa 71 ka mga empleyado (apil na ang 4 nga na-asayn sa Mango Production program sa IGACOS) nga makahatag ug kasayon ug ka-epektibo labot sa paghimo sa ilang mga trabaho.

“It’s very spacious. So it will increase efficiency and effectiveness. Kung naa ka’y convenient workplace open gyod ang imong minds, pagpanghunahuna nimo dako, di pareha adtong tulo na. Ma-tulo na among balay ug mag-uwan. . . So this is really a dream come true building for us sa Agriculture. . . I owe lot of this one from the former governor,” matod ni Dr. Notarte dala ang pasiaw labot sa kanhing opisina sa PAGRO nga natukod sa mga katuigan nga 1950 pinaagi sa nasyonal nga kagamhanan.

Gawas sa P8 milyones nga estruktura, nakabaton usab ang PAGRO ug haluag P3.3 milyones nga Training Center alang sa 70 ka mga tawo nga adunay nakataod na nga LCD ug projector.

Gibutyag sab ni Dr. Ann Notarte nga unta makabaton sila ug dormitoryo sa sunod nga mga adlaw aron mahimong sak-anan sa mga mag-uuma sanglit molungtad ug 2 ngadto sa 3 ka adlaw ang mga package of technologies nga mga pagbansay.

Midugang sab ang Provincial Agriculturist nga sa sobra P11 milyones nga kantidad sa mga tinukod, ang P2.6 milyones maoy project-engaged nga mga premyo sa DavNor PAGRO tungod sa pagkahimong mananaug ingong Agri-Pinoy Rice Achievers, Organic Award ug uban pang mga pasidungog nga nakab-ot sa miaging tuig.


 

More Davnor Updates at

DavNor Karon

 

DavNor News