Sa tinguha nga mapakusog ang tanang Dabaonon organisasyon, gipailawom sa Davao del Norte ang nagkalain-laing organisasyon sa 2-ka adlaw nga seminar sa Community Based Road Maintenance Contracting (CBRMC) pinaagi sa Provincial Engineering Office (PEO), Huwebes, Enero 26 didto sa Big 8 Corporate Hotel, Tagum City.
Gawas nga mapakusog ang ilang kagahom (empowered), kahigayonan sab sa mga sakop sa Peoples Organizations, Kooperatiba, ug mga NGOs nga nakabase sa mga barangay nga madugangan ang ilang kita.
“Usa ka tumong nganong gipalig-on gyod ni sa atong halangdong gobernador, nga ang mga POs, mga associations sa lain-laing lungsod mapalig-on ug ma-evolved into a sustainable, self-sustaining organization sa mga taga baryo aron pod motubag sa inyohang panginabuhian nga panginahanglan,” matod ni Provincial Administrator Samson J. Sanchez nga mituyo lang gyod pag-adto sa seminar aron dasigon ang mga mag-uuma.
Kahinumduman nga sa napulo ka probinsya nga benepisyaryo sa Provincial Road Management Facility (PRMF) gikan sa nasod Australia ang mga lalawigan sa Aklan, Guimaras ug Davao del Norte lamang ang misulay pag-implementar sa Community Based Road Maintenance Contracting (CBRMC) apan bugtong DavNor na lamang ang nakalahutay sa maong programa.
Dugang pasabot sa Provincial Administrator nga ang pagpa-apil sa mga POs diin nasakop ang maong karsada, mopabati sa katawhan sa ilang “responsibilidad sa pagpanag-iya” sanglit sila ang kanunay mogamit sa maong karsada. Haom usab kini sa development thrust sa administrasyon ni Gobernador Anthony del Rosario nga BEST PEOPLE.
“Gitagaag higayon ang mga Peoples Organizations sa lain-laing barangay labina gyod ug asa nahimutang kining mga provincial roads. . . nga dakong papel ug kabahin diha sa pag-maintain sa atoang mga kadalanan. Kini nga programa nahaom ni siya dinha sa kinatibuk-an nga development thrust sa atoang governor sa people empowerment . . . nga naa dinha ang BEST PEOPLE of which ang P diha sa PEOPLE public infrastructure. . . walay intensyon ang atong halangdong gobernador nga dili kini mapalig-on pinaagi sab sa atong mga stakeholders,” dugang pahayag ni administrador Sanchez.
Kompyansa kaayo ang PEO nga molahutay ang programa sa CBRMC sanglit nagmalampuson ang pilot test sa miaging tuig nga gipahigayon pinaagi sa Kipalili Farmers Association diin gi-mentinar niini ang 6.93 kilometros nga karsada gikan sa Kipalili hangtod New Loon sa lungsod sa Asuncion.
“Actually gwapo kaayo ang feedback. Ang feedback nila gwapo kaayo. Mao bitaw nga na-engganyo mi karon nga atoang dungagan pa. Sunod tuig nagplano mi nga doblehon namo. So kun karon nga 152 kilometers, himoon namo nga three hundred plus next year,” masaligon nga pahayag ni Provincial Engineer Raul Mabanglo.
Sa 2-ka adlaw nga seminar, gitudloan ang mga partisipante sa ilang “libro” isip giya (manual) sa pakig kontrata sa PEO alang sa maong trabaho nga naundan sa mga tema: Community-based road planning; Community organizing; Procurement; Road maintenance standard and activities; Road maintenance management and supervision; Occupational health and safety, environment and gender sensitivity; Billing and request; ug Monitoring and evaluation.
