Ubos nga klase sa trabaho apan dili ubos ang ilang sweldo.

Ang mga Peoples Organizations (POs) nga naa ra mismo sa barangay ug nahimong tig-mentinar sa mga probinsyal karsada sa Davao del Norte makadawat ug minimum nga sweldo.

“Usa na siya sa kondisyones nato nga dapat ang wages or sweldo sa motrabaho naa siya sa minimum. . . Ang naa sa atoang program of works sa atoang probinsya, P400 plus ang sweldo sa atoang pinakaubos nga laborer,” matod ni Provincial Engineer Raul Mabanglo atol sa Community-Based Road Maintenance Contracting seminar nga gitambongan sa lain-laing grupo sa mga POs niadtong Enero 25 ug 26 didto sa Big 8 Corporate Hotel, Tagum City.

Gihimong “partners” sa Davao del Norte Provincial Engineering Office ang mga asosasyon nga giila (accredited) sa barangay aron mentinahon ang mga probinsyal karsada sa tulo ka bahin: paglimpyo, paghagbas sa mga sagbot nga makasalipod sa mga motorista, paglimpyo sa mga culverts aron dili ma-alihan ang tubig ug ang pagtabon sa mga lubak sa karsada.

Dugang gipasabot ni Engr. Mabanglo nga ang ilang mga partners mobati gayod ug responsibilidad sa pagmentinar sa mga karsada diha sa ilang barangay sanglit sila ang unang mogamit niini.

“Ang atoang associations. . . nga atoang mga partners naggikan gyod mismo sa mga barangay. . . Ang atoang partners sila na mismo ang maningkamot nga ma-maintain kay tungod ilaha man nga karsada,” dugang pahayag sa DavNor Provincial Engineer.

Alang sa tuig 2017, dunay 16 na ka mga asosasyon ang gihimong partners sa DavNor PEO gumikan sa maayong resulta sa “pilot testing” sa Kipalili Farmer’s Association nga nagmentinar sa 6.93 kilometros nga karsada gikan sa barangay Kipalili hangtod sa New Loon, pulos mga sakop sa lungsod sa Asuncion. 

Moabot ngadto sa 152.76 kilometros sa mga probinsyal karsada ang mentinahon sa mga partners karong tuiga diin ang karsada sa Sawata—Libuton--Monte Dujali—Patil, mao ang pinakataas nga moabot ngadto sa 29.58 kilometros.  

Sa mensahe ni Provincial Administrator Samson J. Sanchez sa CBRMC seminar, iyang gipasabot nga katuyoan gayod sa administrasyon ni Gobernador Anthony del Rosario nga matabangan ang katawhang Dabaonon nga dunay dugang kita aron matubag ang ilang mga panginahanglan sa kinabuhi ilawom sa BEST PEOPLE development agenda.

“Usa ka tumong nganong gipalig-on gyod ni sa atong halangdong gobernador, nga ang mga POs, mga associations sa lain-laing lungsod mapalig-on ug ma-evolved into a sustainable, self-sustaining organization sa mga taga baryo aron pod motubag sa inyohang panginahanglan,” pagdasig ni Provincial Administrator Samson J. Sanchez.

 

Photo:

Aktibong nakigbahin sa diskusyon ang mga miembro sa People’s Organization gikan sa lungsod sa Carmen, Davao del Norte atol sa gipahigayong Community-Based Road Maintenance Contracting seminar didto sa Big 8 Corporate Hotel, Huwebes, Enero 26.


 

More Davnor Updates at

DavNor Karon

 

DavNor News