Walay pestisidyo o mga kemikal nga gamiton aron mapadagko ang mga tanom nga gulay ubos sa programang “Ang Gulayan Revolution” (AGR) nga ipatuman sa tanang 223 ka mga barangay sa Davao del Norte.

Kini ang gipasabot ni Provincial Administrator Samson J. Sanchez, ang “utok” sa programa uban sa Provincial Governor’s Office ug teknikal nga suporta sa PAGRO atol sa orientation Enero 23 didto sa RDR Gym. 

“Karong panahona ibalik nato ang organic vegetable farming sa atoang kabarangayan. Tungod kay kung gusto ka mokaon ug gulay moadto ka sa poblacion, moadto ka sa department store, adto ka sa vegetable section, mopalit kag gulay nga wa ka kabalo giunsa to pag-amoma. Daghan seguro to ug gi-spray. . Unya ang pinakapait, very, very expensive karon ang mga gulay. Ngano man dili pwede nato ibalik didto sa atoang barangay. . . So mao ni karon nga tigom gitawag ta mo aron i-orient Ang Gulayan Revolution, programa sa buhatan sa atong halangdong governor Anthony del Rosario ubos sa coordination ug technical support sa atong Provincial Agriculturist Office,” matod ni PA Sanchez.

Gipasabot usab sa Provincial Administrator nga daghan maayong rason labot sa Ang Gulayan Revolution diha sa mga barangay.

“Daghang makab-ot o impact niini. Una, mo-adres sa atoang malnutrisyon. Ikaduha, makadugang ug income first of all sa barangay, ug ang pinakaimportante makadugang sa income sa atoang mga ginsakpan, mga pamilya,” pasabot sa administrador sa Davao del Norte.

Gibutyag usab ni PA Sanchez nga ang mga produktong libre sa pestisidyo dako kaayo ug tabang alang sa usa ka sustansyado nga Feeding Program nga ilusad sa tibuok probinsya.

“Dili kini lisob kab-oton kung kitang tanan magkahiusa aron mahimo kining realidad. . . Tungod kay duna pa’y usa ka programa nga i-launch sa atong gobernador sa umaabot nga mga bulan. .  kanang Feeding Program para sa atoang mga Day Care nga kabataan. .  Ang inyong abot sa inyong barangay paliton aron ipakaon didto sa atoang mga day care nga mga bata.  . Kita mismo nga nag-amoma sa gulay sayod kita nga nutritious kaayo ang atoang gitanom,” ang dugang kaayohan sa AGR nga gipasabot ni PA Sanchez.

Gawas nga puno sa sustansya ang organikong mga gulay, dili usab dako ang gikinahanglang luna aron makatanom niini ubos sa AGR nga programa.

“Dili kailangan ug dako nga luna alang sa usa ka organiko nga pagtanom ug gulay. . Ang mga gamit nato kanang mga botelya, mga plastic, mga ligid, mga gallon nga di na magamit, pwede kana matamnan ug organic nga gulay. . . . Ang Gulayan Revolution mo-push aron ma-correct nato ug moalkontra ang malnutrisyon, sa kakulangan ug income; labaw sa tanan, kining atong ginakaon nga mga gulay nga saksak kaayo ug pestisidyo ug mga kemikal nga very, very detrimental sa atong mga panglawas,” paniklop ni PA Sanchez.