Nanawagan si Davao del Norte Governor Anthony Del Rosario na dapat seryosohon sa mga katawhan ang mga panghimangno na ginahatag sa gobyerno ug mahimong magbinantayon aron malikayan ang kasubo sa panahon sa kalamidad.

“Pag-adunay mga warnings o mga panghimangno na mugawas inyuha gayud ng seryosohon. Kay kami dinhi sa gobyerno dili pud namo gusto na adunay mahitabo sa atong mga lumulupyo,” saysay sa gobernador human sa pinakaunang pulong sa Regional Peace and Order Council (RPOC) miatong Pebrero 3 sa Probinsya sa Compostela Valley.

Mahinumduman na miresulta sa pagpakanaug ug State of Calamity na proklamasyon ang Probinsya sa Davao del Norte tungod sa dakong epekto sa danyos miatong niaging baha.

Sa taho sa Office of the Civil Defense adunay 66 ka mga barangay, 6 ka munisipyo ug 2 ka syodad ang apektado sab aha.

Mukab-ot ug 42, 271 nga pamilya o 199, 217 nga mga indibidwal ang apektado sa tibuok probinsya sa Davao del Norte na mirisulta sa 30, 092, 435 pesos kinatibukang nawala o danyos sa agrikultura. Adunay sab 1, 820 nga pamilya ang nibakwit sa mga evacuation centers.

Gipasabot sab niya na dako ug responsibilidad ang mga Barangay Disaster Risk Reduction and Management Council sa paspas na pagresponde sa ilang mga sakop.

Gi-awhag sab sa gobernador ang mga katawhan sa matag barangay na musunod sa mga panudlo arun malikayan ang mas dakong danyos sa panahon sa kalamidad.

“Pag-adunay mga warnings na mugawas musunod gyud mo”.

Sa kasamtangan, kanunay gihapon ang pagbantay sa Provincial Disaster Risk Reduction and Management Council (PDRRMC) sa Libuganon ug Saug River na maong dakong hinungdan sa paspas na pagbaha sa probinsya.

DavNor News