Nagpahigayon ug Cardio Vascular Orientation ang Davao del Norte Provincial Health Office aron masabtan ug mapasidan-an ang mga empleyado sa Kapitolyo labot sa nagkataas nga kaso sa hypertension sa tibuok probinsya ug ang kaimportante sa stress management.

Matod ni Provincial Health Officer Dr. Agapito Hornido nga isip usa ka empleyado dili gayod malikayan ang kakapoy sa hunahuna nga mahimong moresulta sa pag-atake sa high blood.

“Ang katuyoan niini, alarming na kaayo ang cause sa death sa Cardio Vascular Diseases dire sa probinsya and even in the capitol. Daghan na kaayo ang moadto sa Provincial Health Office nga hypertensive, diabetic and even with problem on the lungs,” pasabot ni Dr. Hornido.

Atol sa maong orientation, gipasabot pag-ayo ang kaimportante sa kanunay nga pag-monitor sa presyur sa dugo, saktong kaon, ehersisyo ug ang pagtomar sa mga bitamina nga gikinahanglan sa lawas.

Gawas sa kahibalo, mihatag sab ang PHO ug tag duha (2) ka mga bag-ong digital nga Sphygmomanometer (digital blood pressure) ngadto sa tanang probinsyal ug nasyonal nga mga opisina sulod sa Kapitolyo aron sila mismo maka-monitor sa ilang mga empleyado.

Dugang gipasabot sa DavNor Provincial Health Officer nga kanunay’ng andam motabang ang PHO labot sa medikal nga panginahanglan sa mga empleyado apan importante gayod ang regular nga pagpa check-up sa doktor.  

Plano sa hepe sa PHO nga pakusgan pa nila ang paghatag ug edukasyon ngadto sa mga empleyado sa Kapitolyo sa tuyo nga mabantayan pag-ayo ang kahimsog sa ilang panglawas uban ang dakong pasalamat ngadto sa mga opisyales sa probinsyal nga panggamhanan.

DavNor News