Kung adunay itanom, adunay mapupo.
Kini ang gipamatud-an sa 430 ka mga Volunteers Submitted for Reformation kun VSRs nga midawat na ug “sweldo” sa napulo ka adlaw nilang serbisyo diha sa ilang barangay ilawom sa Cash for Work nga programa sa Department of Social Welfare and Development niadtong Byernes, Pebrero 17.
Ang ilang mga serbisyo kasagaran naglakip sa pagpanghinlo ug sanitasyon nga kalihokan sulod sa ilang barangay nga adunay P238.00 nga suhol sulod sa 8-oras nga trabaho.
Pinakadaghan ug VSR-trabahante ang lungsod sa Kapalong nga miabot ug 142 ka tawo kinsa pulos mipauli nga malipayon samtang ang mga dapit sa San Isidro, Asuncion, Talaingod, New Corella, Sto. Tomas, Braulio E. Dujali, Carmen nagpahigayon sab sa pagpasweldo nianang adlawa nga may katibuk-ang gidaghanon nga 430.
Matod ni alias “Ange” nga mapasalamaton gayod siya sa kaayohan nga iyang nadawat.
“Nagpasalamat ko nga ing-ani nakatrabaho ko. . . dakong katabang ni . . nga mausab pod akong kaugalingon,” matod ni Ange nga usa sa midawat ug P2,380 sa 10-ka adlaw nga trabaho.
Matod ni Provincial Administrator ug kasamtangan nga OIC-Governor Samson J. Sanchez nga bisan kung ang minugbo nga solusyon makatabang, apan gilantaw karon sa probinsyal nga panggamhanan ni Gobernador Anthony del Rosario ang dumalayon nga kasulbaran sa ilang kahimtang.
“Epektibo ni siya nga immediate assistance sa atong mga VSR. Pero wala pod nato giwala ang kadtong pang long-term nga assistance o support intervention sa atong mga VSR. . . Ang sa atoa gyod ipaneguro gyod nato nga kadtong mga interventions nga atong na-identify pinaagi sa mga Task Forces masugdan gyod to. . . in fact. . . nagsugod na pod ang mga VSR sa pag-identify, sa pagmanifest kung unsa ang ilahang mga interventions nga gusto,” matod ni OIC-Gobernador Sanchez nga naghisgot labot sa programa sa probinsya alang sa dumalayon nga tabang sa mga VSR.
Kahinumduman nga niadtong Nobyembre 14, gilusad pinaagi sa DavNor PADAC ang Information Management System (IMS) didto sa Kapalong nga nagkuha ug mga gikinahanglang ilhanan sa mga boluntaryong misurender nga mga biktima sa illegal nga droga.
Niadtong Pebrero 7, nagpahigayon sab ang probinsyal nga panggamhanan sa Davao del Norte sa usa ka Career and Employment Coaching sa mga VSRs alang sa pagbansay-trabaho nga haom kanila aron matabangan silang mareporma ug mabalik sa katilingban.
Naghiusa ang mga departamento sa PAdO-LMDD, PAgro, Provincial Veterinarian’s Office (PVO), Technical Education and Skills Development Authority (TESDA), Department of Labor and Employment (DOLE), Local Government Unit- Public Employment Service Office (LGU-PESO) ug ubang ahensya sa kagamhanan nga mitunol ug libreng mga pagbansay.
Desidido gayod ang usa ka VSR alyas “Jane” nga ipadayon ang iyang pangandoy nga maka-abroad pinaagi sa interbensyon gikan sa TESDA aron siya maka-eskwela ug caregiving.
“Akong kuan nga maka-avail jud ko sa TESDA. . nga maka-eskwela ko ug caregiving. . . determinado gyod ko nga maka-abroad mao nga moeskwela gyod ko ug TESDA,” determinadong pahayag ni Jane.
Gawas sa mga pagbansay-trabaho, ang mga VSRs mahimong mopailawom sab sa ubang kurso sama sa pangluto, beautician, massage ug daghan pa alang sa ilang kabuhian.
