Human sa lima ka adlaw nga Historical Committee Exploratory Workshop & Write-Shop niadtong Pebrero 16-20, gilauman nga mogawas sa bulan sa Marso ang sinulat nga kasaysayan sa probinsya sa Davao del Norte gikan sa iyang pagkatukod niadtong 1967 hangtod 2017.
“The 5-day is just an information dissemination of what we intend to do. . March timeline might be ambitious but we will attempt to do this. . report this initiative, the output of the group. . we will like to come up with the first draft of this narrative. . Tan-awon nato kung unsa’y mahuman sa March,” matod ni Provincial Information Officer Sofonias Gabonada, Jr. ngadto sa lain-laing grupo gikan sa matag LGU sa probinsya nga naglangkob sa Araling Panlipunan English ug Filipino teachers, PAdO, PLO, DNLI, Prov’l Tourism Office, PIO, NCIP provincial office, OMA provincial office, Archdiocese of Tagum ug pribadong sektor.
Gawas sa katibuk-ang kasaysayan sa probinsya, gilauman sab nga ang mga partisipante makasulat ug kaugalingong kasaysayan alang sa ilang LGU. Gilauman nga ang mga magtutudlo sa English magsulat sa pinulongan nga Iningles samtang ang mga magtutudlo sa Filipino magsulat sa pinulongang Filipino lakip ang kontribusyon gikan sa Muslim ug IP nga sektor.
Tumong sab sa probinsyal nga panggamhanan ni Gobernador Anthony del Rosario nga makapatungha ug usa ka museum nga mahimong pondohan sa mga butang ug impormasyon may kalabotan sa Davao del Norte.
“Morag di na gyod na mahitabo nga duna gyod ta museum sa July. . So amo lang ginapangayo is the 50 years of this provincial government... We will have an exhibition. We will exhibit na lang the 50 years unsa nga available nga mga documents, available nga mga photos, so on and so forth. So the 50 years journey of this province from 67 to 2017 mao na lang ang i-showcase sa July. Pero seguradohon namo nga whatever i-showcase sa July magamit gihapon sa kinatibuk-an nga museum,” padayong pasabot sa Provincial Info Officer nga nakadawat ug positibong tubag gikan sa mga partisipante.
Ang maong workshop ug writeshop nahimo usab nga malampuson tungod sa mga pagtulun-ang gipaambit sa mga batikang resource speakers nga sila Dr. Maria Serena I. Diokno, kanhi Chairperson sa National Historical Commission of the Philippines, Dr. Antonio J. Montalvan II, National Head of National Committee on Museums, ug Mr. Jose Inigo Homer L. Ayala kanhi chairperson ug vice-chairperson sa National Commission for Culture and the Arts
Ang Davao del Norte nahimong probinsya balik niadtong Hulyo 1967 (RA 4867) ug magsaulog sa ika-50 nga kasumaran karong Hulyo 1, 2017. Kini gilangkuban sa tulo (3) ka syudad sa Tagum, Panabo ug IGaCoS ug walo (8) ka munisipyo sa Asuncion, New Corella, Kapalong, San Isidro, Talaingod, Sto. Tomas, Braulio E. Dujali, ug Carmen.
