Nagtapok ang sobra 70 ka lideres sa lain-laing tribo sa tibuok probinsya alang sa 3-ka adlaw nga Davao del Norte Tribal Leaders Conference 2017 didto sa Big 8 Corporate Hotel, Tagum City Marso 22-24, 2017.
Uban sa tema “Panagtigum Dos Mil Dise-Syete: . . . Pagpalig-on sa mga IPMR ug sa mga Lideres . . . Pagpatunhay sa Kinatibuk-ang Komunidad sa Tribu sa Davao del Norte,” ang mga babaye ug lalaking lider sa tribong Mandaya, Mansaka, Ata-Manobo, Dibabawon, Mangguangan, Sama ug Kagan naghiusa aron hisgotan ang mga programa ug proyekto alang sa kaayohan sa tagsa-tagsa nila ka tribo.
Sa mensahe ni Gobernador Anthony del Rosario pinaagi ni bise gobernador ug kasamtangan nga acting-gobernador Alan Dujali, iyang gipasabot ang direksyon sa probinsyal nga panggamhanan labot sa pagpakusog pag-una sa katakos sa mga lider sa tribo aron sila mismo ang magtabang sa ilahang komunidad.
“Mao na ang akong ipaabot karon labina sa atoang mga miembro sa lumad dinhi sa Davao del Norte nga ang probinsya sa Davao del Norte all-out ang suporta nga ginapaabot sa mga programa, proyekto para i-empowered, i-capacitate atong mga lokal leaders para kamo mismo mag-lead para pod tabangan ang nagkalain-laing komunidad sa Lumad sa atoang probinsya. Mao ni ang direksyon ni Gob del Rosario. Mao ni ang direksyon sa atoang Sangguniang Panlalawigan,” matod ni acting-gobernador Alan Dujali.
Gipasabot sab ni Dujali nga angay’ng tangtangon sa hunahuna sa mga sakop sa tribo nga ubos sila nga klase sa mga tawo. Hinuon angay nilang pakusgon ang ilang mga katakos alang sa kalamboan.
“Ayaw’g hunahunaa nga marginalized ang tribo. Kita naa sa equal footing. . . Naa na man tanan ang pondo sa probinsya, naa na man ang pondo para sa lungsod ug syudad. Ang importante lang adunay abilidad sa pagsungkit sa maong pondo para i-implementar ang programa, proyektong makatabang sa atoang katawhan,” padayong pagdasig sa sa acting-gobernador.
Ang mga topiko sulod sa tulo ka adlaw maglakip sa paghisgot sa mga nahimo (accomplishments) sa NCIP sa Rehiyon XI partikular na ang lebel sa probinsya, ang 10-point agenda nga magpokus pagpakusog sa katakos sa mga tribong lider lakip na ang mga kababayen-an, Ancestral Domain, panglawas, pagrepaso sa lokal nga mga balaodnon ug paghimo sa gikinahanglang kausaban, pagpakusog sa kahibalo labot sa Indigenous People’s Reform Act kun IPRA ug daghang langkit nga mga butang alang sa kalamboan sa tanang tribo sa Davao del Norte.
Gawas sa NCIP, ang ubang ahensya sa PAMANA, DepEd, DSWD, DILG, DTI, TESDA, ug daghan pang uban lakip na ang German Agency for Development Cooperation – Conflict Sensitive Resource & Asset Management kun GIZ-COSERAM apil nga nagtinabangay aron sa pagpakusog sa katakos sa tribo alang sa paghaw-as gikan sa kawad-on.
