Aron mapugngan ang nagkadaghang nalumos nga mga kabataan edad 1 hangtod 9 anyos, gipahinabo sa probinsyal nga kagamhanan sa Davao del Norte sa pakig-alayon sa World Health Organization (WHO) ang pinakaunang “Drowning Prevention Congress” didto sa City Atrium, Tagum City, Martes, Abril 25.

Matod ni Dr. Gerardo Medina, Technical Officer on Emergency and Humanitarian Action & Drowning Prevention Project sa World Health Organization nga nakabase sa Pilipinas, nga kung ang ubang sakit nagkinahanglan ug dugang atensyon, mao usab ang pagkalumos sanglit kasagaran sa nahimong mga biktima maoy mga bata nag-edad 1-9 anyos.

“Kining first Davao del Norte Drowning Provincial Congress is a way of advocating. . .  hatagan ug atensyon ang drowning, ang pagkalumos, kay daghan gyod baya ang nangamatay sa pagkalumos labi na ang mga bata nga nag-edad 1 to 9 years old. . .  Sa tinuod lang dili kaayo siya gihatagan ug atensyon ang drowning prevention. Ang ubang programa nga kung asa daghan ang nangamatay. . .like dengue, malnutrition, malaria, naa siya’y solid nga programa, naa siya’y pondo. . .pero dapat unta pod ang drowning prevention mahatagan ug atensyon ug mahatagan ug pondo,” matod ni Dr. Medina.        

Kung nganong dinhi sa Davao del Norte gipili sa representante sa WHO ang unang pagpahinabo sa drowning prevention congress, matod ni Dr. Medina nga ang todo suporta sa lokal nga mga opisyales ang nag-unang hinungdan ug gawas pa ang probinsya maoy usa sa nag-unang lima ka mga rehiyon diin daghan ang nangalumos.

“Among the different regions sa Philippines, Davao del Norte is among the top 5 drowning rates. . . When we got funds . . .para mag-initiate ug pilot projects here. . . we choose Davao del Norte not only because taas ang drowning rate dire but also because this being a pilot project, we wanted to ensure the success of this project. So we choose Davao del Norte because one criteria that we use was the support of the local government. And we know that in Davao del Norte very supportive ang local government. I used to be with the Department of Health, area nako ning Davao del Norte. And I know ang local officials dire, supportive gyod,” matod sa pinadala sa WHO.

Matod ni DavNor Provincial Health Office Drowning coordinator Ms. Doris Sobremisana nga ang maong programa nalakip na sa 2018-2020 nga badyet sa lokal nga panginahanglan sa panglawas.  

Ang mga lungsod sa Braulio E. Dujali ug Kapalong ang unang nakabenepisyo sa programa samtang ang ubang LGUs naghulat alang sa eskedyul.

Abtik dayon nga misanong ang mga LGUs Drowning Prevention coordinators kauban ang ilang mga barangay kapitan nga mitambong sa pinakaunang Drowning Prevention congress ingong timaan sa ilang todo suporta sa maong programa.


 

More Davnor Updates at

DavNor Karon

 

DavNor News