Gipangunahan gayod ni Gobernador Anthony del Rosario ang tanang departamento sa Kapitolyo alang sa pagpakigbahin sa Brigada Eskwela 2017 pinaagi sa pagbisita sa mga eskwelahan didto sa Suaybaguio-Riña Elementary School, La Filipina Elementary School ug La Filipina National High School sugod niadtong Martes, Mayo 16, 2017.

Ang tanang departamento sa probinsyal nga kagamhanan adunay naasayn nga eskwelahan sulod sa Davao del Norte.

Sa usa ka Memorandum nga gipetsahan ug Abril 27, 2017, gipaabot sa gobernador ngadto sa tanang department heads nga paapilon ang 10-15 ka mga personahe sa matag departamento ingong pagpasalamat ug paglantaw utang kabubut-on sa mga kaayohan nga nadawat gikan sa maong institusyon.

“Naghimo ko ug Memorandum Order. .  nga ang tanang departamento sa provincial capitol kinahanglang mo-adopt gyod sila ug eskwelahan dinhi sa Davao del Norte para makatabang sa tanang mga improvements nga kinahanglan ma-implementar bag-o magsugod ang eskwela,” pahayag ni Gob Anthony atubangan sa mga miapil sa Brigada Eskwela sa Suaybaguio-Riña Elementary School nga giapilan sab ni Magugpo North Barangay Captain Reynante Robles ug mga konsehales.

Gipasalamatan gayod ni School Principal Erlinda Quinto ang gihimong pag-apil ni Gob Anthony sa Brigada Eskwela nga bisan kung ang formal opening maoy Mayo 15, “nag-opening” na sab sila pag-otro tungod sa pagpili sa gobernador sa iyang eskwelahan nga dala pa niini ang 18 ka mga kandidata sa Bb. Davao del Norte 2017.

“Yesterday was the opening and today is another opening. . . Maka-proud. Among the schools in Tagum City, Suaybaguio-Riña Elementary School ang napili,” pahayag-pasalamat ni Principal Quinto dili lang ngadto kang Gob Anthony lakip na sa mga empleyado sa Provincial Information Office (PIO), mga opisyales sa barangay ug mga ginikanan nga miapil sa Brigada Eskwela kagahapon.

Gawas sa Suaybaguio-Riña Elementary School, lakip sab nga gi-adopt sa PIO ang Saludares Elementary School sa Barangay Magdum, Tagum City pagka Huwebes, Mayo 18. Ang mga departamento sa PAGRO, Carmen District Hospital, PVO, PENRO, PEO, PEEDO, PADO, PGSO, PPDO, PGO, PTO, Kapalong District Hospital, PSWDO, PACCO, PASSO, PHRMO, PHO, PBO ug tanang ubang departamento adunay kaugalingon nga naasayn nga eskwelahan hangtod sa Mayo 19, 2017.

Ang Brigada Eskwela maoy usa sa mga lakang sa Departamento sa Edukasyon isip pangandam sa pagbukas klase sa tanang publikong tunghaan sa nasod karong Hunyo 5, 2017.


 

More Davnor Updates at

DavNor Karon

 

DavNor News