Molupad na sa kahanginan ang pinaka-unang lokal TV station dinhi sa Davao del Norte karong Byernes, Hunyo 16, 2017.

Kini mailhan ingong DXPT Channel 48 o kasagaran tawgon nga PTV DavNor nga gipanag-iya ug gidumala sa probinsyal nga kagamhanan sa Davao del Norte. Ang Permit No. BSD-0176-2017 gikan sa National Telecommunications Commission nagtugot sa iyang operasyon epektibo Marso 15, 2017 hangtod Marso 14, 2020,

  

Ilawom sa BEST PEOPLE development agenda sa administrasyong Gobernador Anthony del Rosario, hugot niining gituohan nga “ANG KAMATUORAN KATUNGOD SA KATAWHAN” nga angay’ng masayran sa tanang Dabaonon nga nagpuyo sa bisan asa nga suok sa probinsya. Katuyoan sab niini nga mapaduol ang kagamhanan diin ang PTV DavNor magsilbing bantawan aron mahibaw-an ang tinuod nga kabalaka ug panginahanglan sa katawhan.

Sama sa ubang regular (free) tv station (GMA, ABS-CBN) ang PTV DavNor Channel 48 maghatod ug mga balita, mga panghitabo gikan sa internasyonal, nasyonal ug lokal nga talan-awon. Apan kung bahin sa lokal nga mga katikaran, ang PTV DavNor nakabentaha sanglit anaa kini mismo sa iyang tugkaran ug dali dayon kining mahatod ngadto sa publiko. Lakip nga isibya niini ang “in-house” nga mga programa sa People’s Television Network, Incorporated, kun PTNI ang inahang estasyon sa PTV DavNor.

Kahinumduman nga niadtong Oktubre 28, 2016 atol sa pagtapos sa kasaulogan sa Press Freedom Month, nagpinirmahay ug Memorandum of Agreement (MOA) ang PTNI ug probinsyal nga kagamhanan sa Davao del Norte (PGDN) labot sa pagpatungha sa lokal nga estasyon sa telebisyon. 

Wala dayon kini nakaserbisyo sa publiko bisan kun gibayran na sa DavNor ang “one-time accreditation” ug ang unang “monthly fee accreditation” sanglit gipahimutang pa niini ang estasyon ug ang gikinahanglang transmitter, tower, ug mga kagamitan sa pagsibya.

Gilaoman nga sa bag-ong PTV DavNor, daling masayran sa katawhang Dabaonon ang nunot-sa-panahon nga mga katikaran sa Davao del Norte nga sulod sa daghang tuig limitado lamang sa mga Skycable ug Wise Cable subscribers.


 

More Davnor Updates at

DavNor Karon

 

DavNor News