Gigahin gayod ang “Sayabanana sa DavNor,” usa ka espesyal nga adlaw alang sa industriya sa saging ingong pag-ila sa iyang dakong papel sa ekonomiya sa probinsya Lunes, Hunyo 26 ingong kabahin sa pagsaulog sa ika-50 nga anibersaryo  sa Davao del Norte.

Si ABS-CBN Mag-AgriTayo host Ruben Gonzaga ang milingaw sa mga mag-uuma sa saging alang sa tibuok adlaw nga kalihokan.

“As we celebrate our golden anniversary, we cannot afford to forget this very important industry for the impeccable efforts that we have contributed to the growth of our province. Atong giila ang dakong kabahin sa pagpalambo sa atong ekonomiya ug sa probinsya sa kinatibuk-an,” pahayag ni Gobernador Anthony del Rosario ngadto sa mga mag-uuma sa saging gikan sa lain-laing LGUs sa Davao del Norte.

Ang mga lecture labot sa ekonomikanhong importansya, nutrisyon, maayong pagdumala ug ilabina ang pagwagtang ug pagkontrolar sa lain-laing sakit sa sagingan gipasabot pag-ayo sa mga eksperto sa tanom gawas pa sa mga seedlings ug premyo nga nadawat sa mga mag-uuma. Nakadawat sab ug libreng lugaw ang tanang nanambong nga naglakip kang bise gobernador Alan Dujali ug BM Ernesto Evangelista.     

Liboan ka mga ektarya ang gitamnan ug saging ilabina ang Cavendish nga cultivar nga mihatag ug trabaho sa liboan nga Dabaonon hinungdan sa 70% nga tampo niini sa ekonomiya sa probinsya.

Gawas sa dakong amot sa ekonomiya, daghan sab kaayo ug gamit ang tanom nga saging alang sa pagkaon sa tawo ug hayop, pangisda, handicrafts, ug ilabina alang sa kahimsog sa panglawas. Ang usa ka buok saging mahimong tinubdan na kini sa 23% nga potassium ug 41% nga Vitamin B6 nga gikinahanglan sa usa ka tawo alang sa tibuok adlaw gawas pa sa daghang medisinal ug therapeutic nga mga kaayohan.

Ang panit (peel) sa saging nasulayan sab nga maayong gamiton sa pagtangtang sa kalunggo (wart) ug pagtambal sa mga pinaakan sa lamok pinaagi sa pagpahid niini hangtod mawala ang hapdos.  

Ilado ang Davao Region ilabina ang Davao del Norte nga number 1 producer ug exporter sa Cavendish nga saging nga nakaabot sa China, Japan, lain-laing dapit sa Middle East ug ubang dapit sa kalibotan hinungdan sa kusog nga pagtubo sa ekonomiya sa Davao del Norte.

DavNor News