Sa dili madugay may emergency hotline number na ang probinsya sa Davao del Norte nga matawagan sa tanang panahon alang sa emerhensya nga susama sa 911 sa Davao City.
Kini ang gibutyag ni Provincial Administrator ug Executive Officer sa Provincial Disaster Risk Reduction Management Council (PDRRMC) Samson Sanchez atol sa panagtapok sa Disaster Responders gikan sa tanang LGUs sa probinsya sa pagtimaan sa bulan sa Hulyo ingong National Disaster Resilience Month, Martes, Hulyo 4, 2017 didto sa Tagum City Atrium.
“Niadtong milabay’ng semana sa pagselebrar nato sa atoang 50th golden jubilee sa probinsya, duna mi test connectivity sa DavNor 911 nga gi-link namo sa Globe Telecom. . Eventually within a year, we will officially launched and institutionalized our DavNor 911. Duna la’y proseso nga buhaton. . and we will have a unique number for the province and that is “DavNor 1967,” dugay-dugay lang siya ma-aprobahan sa atoang Telecommunications Commission,” pagbutyag sa PDRRMC Executive Officer.
Uban sa tema 4Ks: Kamalayan sa Kahandaan, Katumbas ay Kaligtasan, ang mga Responders dili lamang simpleng nagtapok kundili aron sab dugang madasig ug makakat-on sa mga maayong gihimo (best practices) sa ubang LGUs.
Sa mensahe ni Gobernador Anthony del Rosario nga gipahayag pinaagi ni Provincial Administrator Samson Sanchez, gidayeg niini ang kanunay’ng andam nga tinamdan sa mga Responders sa tanang higayon.
“Natural or not, however, we must be prepared in any disaster and must be resilient toward response and actions. Nowadays we are not only preparing ourselves for disasters or man-made but also emergencies and accidents,” pahayag ni Sanchez.
Gibutyag sab sa PDRRMC Executive Officer nga ang probinsyal nga kagamhanan ubos sa Davao del Norte Learning Institute sa pakig-alyansa sa Davao del Norte State College mag-mugna ug usa ka kurso Bachelor of Science in Disaster Management alang sa propesyonal nga pagtubo sa mga disaster responders ug alang sab sa mga wala makatapos ug kurso.
Matod sab ni Regional Director XI sa Office of Civil Defense (OCD) Leoncio Cirunay nga ang panagtapok magpaglig-on pa sa mga Disaster Responders diha sa upat ka thematic areas sa disaster management nga mao ang Disaster Prevention & Mitigation, Disaster Preparedness, Disaster Response ug Disaster Recovery.
“Kabalo mo anang four thematic areas? Kanang sa Disaster Prevention & Mitigation kinsa ma’y namahala ana? DOST; Disaster Preparedness, DILG; then Disaster Response. . DSWD, mao nang mga co-chair nato; Disaster Recovery, ang NEDA,” saysay sa OCD XI Regional Director.
Bisan kung naka grand slam na ang DavNor PDRRMC tungod sa tulo ka sunod-sunod nga higayon nga Gawad Kalasag Awardee gikan sa tuig 2015, 2016 ug 2017 sa Rehiyon XI, padayon gihapon niining gipauswag pa ang katakos sa mga Responders ug dugang pagkuha ug mga kahimanan.
