Bisan wala pa mahuman, gibisita sa 72 ka mga estudyante gikan sa University of Southeastern Philippines (USeP) Tagum City ang bag-ong PTV DavNor studio ubos sa pagdumala sa Provincial Information Office alang sa educational tour kagahapon, Lunes, Hulyo 17, 2017.

Ang laing grupo sa 36 ka mga estudyante mibisita sab karong adlawa, Hulyo 18 sa parehas nga katuyoan.

Matod ni Ms. Maricel Palomata, miembro sa USep faculty nga dala niya ang grupo sa second year Bachelor in Science of Education nga mga estudyante aron makakuha ug eksperyensya sa ilang mass communication nga subject.

“Naa mi mass com nga subject, unya exposure para masabtan nila ang kurso, ang mga theory nga among gipang-discuss sa klase,” pahayag sa English professor sa USeP.

Sulod sa tunga sa adlaw, gipasabot ngadto sa mga estudyante ang proseso gikan sa pagkuha ug balita, pag-editing, pag-rekord ug dayon sa pagsibya pinaagi sa free tv station Channel 48 sa Davao del Norte ngadto sa publiko. Ang PTV DavNor Channel 48 anaa karon sa test broadcast samtang gipahimutang pa ang ubang mga kagamitan.

Dugang gipahayag ni Ms. Palomata nga mas maayo unta nga adunay Mass Communication nga kurso dinhi sa Davao del Norte aron dunay kapilian sanglit iyang nakita nga daghan angg nakiling sa maong kurso.

“Daghan ko’g nakita nga mga estudyante nga inclined sa ani nga field. Maski bisa’g BSEd English sila nakita nako nga gusto pod nila nga mag mass com,” dugang pahayag ni Ms. Palomata.

“Since I’m part of the school, nakita pod nako kung unsa siya ka crucial, unsa siya ka nindot as way of communication sa atong DavNor,” matod ni Ms. Cynna nga nagpaambit sa iyang eksperyensya labot sa paglibot nila sa mga pasilidad sa PTV DavNoir studio.

Matod ni Mr. Sofonias Gabonada, Jr. ang PTV DavNor naghatag ug paglig-on sa mahimong bag-ong ngalan sa PIO ngadto sa Provincial Information Communication and Knowledge Management Office kun PICKMO nga sa dili madugay, mahimo nang opisyal nga pangalan.

Karong Hulyo 28, moabot si Presidential Communications Operations Office (PCOO) Secretary Martin Andanar alang sa pag-inagurar sa bag-ong PTV DavNor.


 

More Davnor Updates at

DavNor Karon

 

DavNor News