Gisugdan na ang pagpanday nga himoong usa ka cashless society ang tibuok probinsya sa Davao del Norte pinaagi sa pinakaunang Provincial Citizen ID System sa tibuok nasud.
Kini human nga maaprobrahan ang Joint Venture Agreement tali sa probinsyal nga panggamhanan sa Davao del Norte ug Globe-Mynt. Ang maong kasabotan nagtumong nga mapakusgan pa ug mahimong paspas ang paghatag ug serbisyo sa katawhan pinaagi sa usa ka cashless nga transaksyon.
Tungod niini gipahigayon ang usa ka adlaw nga Orientation and Workshop on Alternative Government Revenue Collection, Disbursement, Payment and Citizen ID System nga giapilan sa mga Project Implementers ug Technical Working Group sa kapitolyo, Hulyo 19 sa Bulwagan ng Karunungan nga gipangunahan sa Globe Business Solutions ug Mynt.
Sa maong workshop gipasabot sa tigpamaba gikan sa Globe Business Solutions ang mga maayong pagbana-bana ug pagsusi sa mga proseso matag opisina arun mahimo pang mas epektibo ug hapsay ang paghatag ug serbisyo. Gipaila usab ang makabag-ong pamaagi sa pagdumala sa mga proseso sa opisina.
Gibutyag sab ni Globe Business Industry Head for Visayas and Mindanao Marie Elaine Carr atoll sa orientation workshop ang pagkahibalo sa mga hagit nga ilang masugatan sa paghatod ug serbisyo.
“The objective actually is to help DavNor especially the department heads and process owners articulate their painpoints. With their current practices and challenges nila, once they realized those things will see how we can actually help them resolve those issues,” saysay ni Carr
Dugang sab gipailaila sa Globe Business Team ang mga Web Based System Solutions ilabina na ang pagtipig sa mga dokumento nga adunay dakong kakulangan ug nakitang dakong hagit sa kapitolyo gamit ang online storage.
Sa maong pagbansay gipasabot ngadto sa mga partisipante ang kauswagan sa Citizen ID System ug ang mga benepisyo niini nga iimplementar sa tibuok probinsya. Ang maong ID System ipatuman dili lamang sa mga empleyado sa kapitolyo ug apil na sab ang mga private-public partners ug uban pang government agencies.
Ang probinsyal nga panggamhanan sa DavNor masaligon nga mahimong malampuson ang maong proyekto.
Tungod sa daghang mga bentaha, gi-awhag ni Carr ang mga silingang probinsya sa Davao del Norte nga konsiderahon ang lakang nga mahimong cashless ang transaction sa matag opisina sa gobyerno.
