Malamposong gipahitabo ang kinaunhang Land Slide Drill alang sa mga residenteng lumad sa Munisipyo sa Talaingod Hulyo 22, 2017 nga gipangunahan sa Provincial Disaster Risk Reduction and Management Council kun PDRRMC sa Probinsya sa Davao del Norte.

Matod ni Glenda Delideli, Officer In-Charge sa PDRRMC nga tumong sa maong kalihokan ang pag edukar sa mga lumad sa mga angay nga buhaton panahon nga modahili ang yuta.  

“Tumong sa maong aktibidad nato karong adlawa ang masabtan nila kung unsa gyud ang posibleng mahitabo panahon nga adunay landslide ug kung unsa ang ilang mga himoon. Ang atong gihatag sa ilaha is kung unsa gyud ang actual na pwedeng himoon, asa sila mupadolong ug kung unsa pud ilang timailhan na kelangan na magbakwet,” saysay ni DeliDeli

Dugang sab PDRRMC OIC nga ang trenta (30) segundos nga pagbagting sa batingaw nagpasabot nga dapat mangandam sa mas taas pa nga alerto ang katawhan. Ang saysenta (60) segundos nga pagbagting nagpasabot sa posibleng pagbakwit ug ang walay undang sa pagbagting nagpasabot sa pugsanon nga pagbakwit sa mga katawhan.

Ang maong kalihokan giapilan sa dose (12) ka pamilya nga nahimutang sa mismong mga lugar nga adunay dakong posibilidad sa pagdahali sa yuta.  

Mapasalamaton si Dante Sibugan, kanhi Chairman sa Upper Mesolong sa pagpahigayon sa maong Land Slide Drill diin ilang nasabtan ang importansya niini ug ang mga angay pagabuhaton ilabina sa panahon sa kasubo.  

“Daghan gayud mig natun-an sa maong drill kay inig abot sa katalagman sa atoa makapangandam gyud ta ug dako ang among pasalamat sa mga opisyales sa dakong kabahin nila sa amoa sa tanang lumulupyo ug tungod sa ilaha nakabalo mi na kini diri sa amoa delikado diay kaayo mi,” sulti ni Sibugan. 

Gawas sa munisipyo sa Talaingod, magpahigayon sab ug usa ka adlaw nga Fire and Flood Drill sa Kapalong ug uban pang mga munisipyo ang PDRRMC.


 

More Davnor Updates at

DavNor Karon

 

DavNor News