Padayon nga gihatagan ug pagbansay sa probinsyal nga kagamhanan sa Davao del Norte ang mga mag-uuma sa mangga aron modaghan pa ang ilang abot diin 31 ang nagtapos sa 3rd batch mango-season long training niadtong Huwebes, Agosto 3.  

Sa mensahe ni Gobernador Anthony del Rosario nga gipahayag ni Mr. Christopher Ramos, gisubli sa gobernador ang iyang bug-os nga suporta sa liboan ka mga “manggaranon” dinhi sa Davao del Norte.

“More than 2.5 million farmers are dependent on our mango industry including the thousands here in Davao Region. . . The support of DOST and DA thru our Provincial Agriculture Office led by Dr. Ann Notarte included. . .mangoes under the high value commercial crops. . This season long training is very timely in showing that we boost our mango industry. Fresh ideas for the betterment of your yield,” matod sa mensahe ni Gob Anthony.

Ingong agrikultural nga probinsya, gihatagan ug pokus sa administrasyong Anthony del Rosario ilawom sa iyang BEST PEOPLE development agenda ang agrikultura.

“Under our BEST PEOPLE ten-point agenda, the first “E” that stands for Enhanced Agri-Aquaculture is an assurance of the provincial government’s support to agriculture for our mango farmers and stakeholders,” dugang pamahayag sa mensahe sa gobernador.  

Matod ni DavNor Provincial Agriculturist Dr. Anastacia Notarte nga sa ika-3ng hugna sa training, ilang giapil ang tanang “manggaranon” sa tibuok probinsya gawas sa naka pokus nga atensyon sa mangga sa Island Garden City of Samal sanglit kini ang dunay kinadak-ang produksyon sa prutas gikan sa 120,000 ka punoan nga namunga ug sa umaabot nga 56,000 ka punoan nga padayong gi-atiman.   

“Data gikan lang sa Island Garden City of Samal kay naa ta’y maayo nga monitoring system pinaagi sa City Agriculturist Office. . . last year naa ta’y nakuha nga 1.2 million metric tons nga abot gikan sa atong isla. . dire sa mainland wala mi data as to pila ka tonelada nga na-harvest kay ang amoang concentration is on Island Garden City of Samal,” pasabot ni Dr. Notarte.

Dugang pahayag sa hepe sa PAGRO nga ang DavNor Mangga gikan sa Samal nakaabot na sa Australia, Japan, Korea ug Hongkong samtang ang uban maoy alang sa lokal nga konsumo nga ang katam-is sa prutas ikapasigarbo.

“Kumparar nato dire sa atong mainland, ang percentage sweetness is 10 to 12% while mangga gikan sa isla mokabat ni siya ug 14-22% “Brix”, kanang nag-measure sa iyang katam-ison,” esplikar sa DavNor agrikulturista.

Ang lalim nga katam-is sa DavNor Mangga sa Samal maoy tungod sa anapog (Limestone) nga klase sa yuta uban sa initon nga klima sa isla nga magpadali sa pagproseso sa asukar diha sa prutas.

Dugang gibutyag ni Dr. Notarte nga sa Mindanao-wide mango stakeholders’ forum sa miaging semana, giduso ang paghimo ug Mango Research Center susama sa isla sa Guimaras aron gayod matutokan pag-ayo ang industriya.

Ang 3rd batch mango-season long training gipondohan sa Australian Center for International Agricultural Research ug probinsya.


 

More Davnor Updates at

DavNor Karon

 

DavNor News