Gitambongan gyod ni Department of Social Welfare Development Assistant Secretary ang ika 40 nga anibersaryo sa Home for the Aged (HA) Byernes, Agosto 4, diha sa Visayan village, Tagum City.
Nga may tema: ‘Pag-ibig na Tunay Pampahaba ng Buhay,’ si DSWD ASec Dr. Lorraine Marie T. Badoy mao ang nanguna sa pagputol sa ribbon sa bag-ong nadugang nga bilding alang sa mga biniyaan ug gipasagdan nga mga tigulang nga gisagop sa Center atol sa maong selebrasyon.
“For the first time in the history of the department there is an assistant secretary that is assigned specifically for the centers and institutions. . . These are the less of the least. . . tayo may pamilya, sila wala. So tayo ang magiging pamilya. Tayo ang tatayo . . na pamilya nila,” pahayag ni ASec Badoy atubangan sa mga tig-suporta sa Center nga naglakip sa mga LGUs, NGOs ug mga pribadong indibiduwal.
Ang probinsyal nga kagamhanan sa Davao del Norte maoy usa sa hugot nga tigsuporta sa Home for the Aged bisan gikan pa sa iyang pagsugod. Sa pagkakaron ang administrasyon ni Gobernador Anthony del Rosario naggahin ug P300,000 mil matag tuig way labot sa lain-laing porma sa tabang nga gitunol ngadto sa Center.
“Sa Congressman pa ko, akong na-file ang Mandatory Philhealth Coverage sa tanang senior citizens nga nahimong balaod ingong Republic Act 10645. Bisan pa niana dili gihapon kini makatubag sa tanan nilang medikal nga panginahanglan. Busa ingong inyong gobernador, giseguro gayod nato nga apil ang mga tigulang sa atong BEST PEOPLE development agenda, ubos sa “O” nga nagkahulogan ug Optimum Health and Social Services, adunay gahin nga pondo alang sa tanang Senior Citizens sa probinsya,” matod sa mensahe ni Gobernador Anthony nga gipahayag pinaagi ni Executive Assistant Nemesis Nuñez.
Tungod sa paghago ug pag-atiman sa mga tigulang, gikomendahan sa gobernador ang paghago sa mga trabahante sa Center.
“Morag sayon lang sultihon ang pag-atiman, apan segurado ko nga lahi gayod kini sa aktuwal sanglit dili kalikayan nga magpabadlong usahay ang atong mga tigulang dinhi sa Center. Dili sayon nga mag Caregiver mao nga dako na ug sweldo didto sa laing nasod. That is why I really commend your hard work, patience and the love in caring for these aged ones,” dugang pahayag sa mensahe ni Gob Anthony.
Matod ni Center Head Annie L. Rosalinda nga sa pagkakaron ang Home for the Aged adunay 68 ka mga , mga abandoned, neglected ug walay kapuy-an nga mga tigulang nga giatiman sa 31 ka mga personnel nga usa ka hagit ang pag-atiman kanila.
“Perte gyod ang hagit nga naa sa atong mga empleyado dinhi sa Home for the Aged kay kabalo baya gayod ta sa dynamics sa usa ka tigulang nga kinahanglan nga kung gusto gyod ta moatiman sa ilaha, mohatag ug serbisyo, kinahanglan taas, taas gyod ang imong pailob, pasensya,” pasabot ni Rosalinda.
Gawas nga dangpanan sa mga biniyaan ug walay kapuy-an nga mga tigulang, ang Home for the Aged nagsilbi sab nga social laboratory sa mga estudyante sa Nursing, Physical Therapy, Medicine ug mga Caregivers nga mag on-the-job training.
