Gi-ablihan na ngadto sa publiko ang ikalimang Negosyo Center sa Davao del Norte diha sa Island Garden City of Samal, Martes, Agosto 29, 2017.

Base sa RA 10644 Ang Negosyo Center gipatungha alang sa pagpauswag ug pagpasayon sa paghimo ug negosyo ug motabang nga mabatonan ang mga serbisyo alang sa mga Micro, Small, Medium Enterprises (MSMEs) diha sa iyang ginsakpan sama sa pagrehistro sa negosyo, paghatag ug tambag, paghatag ug gikinahanglang impormasyon ug adbokasiya, pag-monitor ug mga pagbana-bana ug ubang gikinahanglan serbisyo aron mapalambo ang negosyo.

Sa pagbukas niadtong Byernes, giawhag ni Gobernador Anthony del Rosario nga pahimuslan ang mga serbisyo nga gitunol sa mga Negosyo Centers aron molambo ang negosyo ug dili magpabiling gagmay.

“Let us remember that the makings of a good business always starts from good ideas and the Go Negosyo Centers are here to help actualize those good ideas. . Micro, small business do not always stay small. Mao ni ang atong gipaningkamotan nga ang atong mga micro pinaagi sa tabang sa gobyerno, mogradwar ngadto sa small, . . ug eventually mogradwar ngadto sa large enterprise. That is the essence of our interventions sa gobyerno. Gani importante nga sukad sa paghimo sa micro businesses kinahanglan matudloan na gyod sila para makaabot didto sa mas dagko nga negosyo,” awhag ni Gobernador del Rosario ngadto sa mga taga Samal nga presente sa maong okasyon.

Niadtong 2015, unang gibuksan ang Negosyo Center diha mismo sa DTI bilding sulod sa Davao del Norte Capitol compound ug sa tuig 2016 gibuksan sab ang Tagum City, Panabo City ug New Corella. Giisip ni Gobernador del Rosario nga importante kaayo ang ikalimang Negosyo Center sa Samal.

“This Center is especially important dire sa Island Garden City of Samal. . Sa tibuok probinsya sa Davao del Norte, the Island Garden City of Samal is the number one tourism destination sa atong probinsya,” rason ni Gobernador del Rosario sa ka-importante sa gibuksan nga Negosyo Center sa isla.

Gibutyag sab ni DavNor DTI Business Development Division personnel Marivic Merquita nga nakalinya na karong tuiga ang pagbukas sa mga Negosyo Centers diha sa lungsod sa Carmen, Braulio E. Dujali ug Sto. Tomas samtang gilaoman sab nga mahilakip ang lungsod sa Asuncion karong tuiga 2017. Ang mga lungsod sa San Isidro ug Talaingod gitumong nga mabuksan sa tuig 2018.


 

More Davnor Updates at

DavNor Karon

 

DavNor News