Tungod sa implementasyon sa Martial Law mius-os ang gidaghanon sa nahitabong lain-laing krimen sa tibuok probinsya sa Davao del Norte.

Kini ang gihatag nga taho sa Provincial Police Office sa Davao del Norte atol sa gipahinabong Provincial Peace and Order Council (PPOC) meeting kagahapon, Huwebes, Septyembre 7, 2017.

Sa mga datos nga gipakita ni Police Superintendent Marohom, deputy alang sa police administration sa Davao del Norte, miabot ug 15.52% ang average nga pag-us-os sa mga “focused crimes” lakip na ang rape kung itandi ang Enero hangtod Agosto 2016 sa Enero-Agosto 2017. Sa tulo ka focused crimes, nag-una gihapon ang “Kawat” (theft) nga adunay 511 sa 2016 kung itandi sa 353 sa 2017 nga gisundan sa robbery (panulis) 282 kumpara 194 ug physical injury nga 249 kumpara 246.

Bugtong ang “murder” ang mitaas sanglit matod ni Police Superintendent Marohom tungod kini kay ang mga nalangkit sa war on illegal drugs nga operasyon giapil apan kinahanglan pa nga i-validate pag-ayo ang maong datos.

“If you take out all of the people that died because of the drug operations, ano na ang maiiwan na numbers dyan? Kalahati? 80%? Ano na ang maging resulta? . . When you put the data on murder, so dapat ihiwalay nyo dahil sa drug operations para makita namin kung ano talaga ang murder na hindi connected sa drug operation,” komento-pangutana ni PPOC chairman Gobernador Anthony del Rosario. 

Komento sab ni Asuncion Mayor Atty. Eufracio Dayaday, Jr. nga sanglit walay gisang-at nga kaso ug wala pa’y nahukman sa korte, angay lang nga i-classify una kini ug “homicide.”

“Being a lawyer seguro kanang mga drug operations kung naay namatay, seguro ang records ana should be homicide, bahala kung mo-file ang hingtungdan ug murder pero i-classified gyod na siya ug homicide,” matod sa abogado-mayor sa lungsod sa Asuncion.

Uyon usab ang Provincial Fiscal sa Davao del Norte nga si Fiscal Norman Solis sa pahayag ni Mayor Dayaday, Jr.  

Bisan sa panagsa nga engkwentro sa mga NPAs nga nag-operate sa Davao del Norte, gi-classify sa Army ug kapolisan nga sa katibuk-an “generally peaceful” ang tibuok probinsya ilabina sa gi-extend deklarasyon sa Martial Law hangtod sa Disyembre, 2017.


 

More Davnor Updates at

DavNor Karon

 

DavNor News