Pormal na nga gibuksan ang Capitolympics Lunes, Septyembre 25, 2017 ingong kabahin sa pag-obserbar sa ika-117 nga selebrasyon sa Civil Service sa mga empleyado sa Davao del Norte Kapitolyo.
Niadtong Septyembre 11 lamang, gipangunahan sa Provincial Human Resource Office (PHRMO) ang pag-obserbar sa usa ka bulan nga selebrasyon pinaagi’g daghang programa alang sa kaayohan sa mga empleyado apil na niini ang sports fest sa Capitolympics.
“By powers vested in me as governor, I now officially declared the Davao del Norte Capitolympics open,” matod ni Gobernador Anthony del Rosario atubangan sa liboan ka mga empleyado sa Kapitolyo nga gibahin sa 6 ka team clusters: Green Supreme nga gilangkoban sa mga departamento sa PGO ug PADO; Red Patriots nga naglakip sa PICKMO, PHRMO, PGSO, PSYDO, ug PSWDO; Orange Vikings nga gilangkoban sa tibuok PEO; Yellow Stars nga naglakip sa PBO, PHO, PACCO, PASSO, PTO, PLO ug PAGRO; Blue Tornadoes nga gilangkoban sa VGO, SP, PVO ug PPDO; ug, ang Lavender Adrenaline nga gilangkoban sa tibuok PEEDO.
Magtigi ang mga empleyado sa 17 ka mga dula lakip na ang Search for Mr. & Ms. Capitolympics diin ang Red Patriots ang nahimong Mr. Capitolympics 2017 samtang ang Ms. Capitolympics 2017 nga korona giangkon sa Yellow Stars.
Human sa pagbukas, nagpakita dayon sa ilang abilidad ang unom ka grupo alang sa Zumba Dance diin ang Lavender Adrenaline ang midaug. Ang ubang eskedyul sa dula moabot pa hangtod Disyembre 14 aron sab dili ma-apektohan ang trabaho. Apil sab nga tigion ang Biggest Losers challenge alang sa mga ‘obese’ nga mga empleyado.
“Let us take this annual sports fest as an opportunity to showcase not only our talents and capabilities or as a team but also to promote unity, camaraderie and sportsmanship between different sectors and offices. These values are a reflection of well-oiled system of the provincial government,” mensahe ni gobernador del Rosario sa mga magdudula nga empleyado.
Apil sa pag-obserbar sa ika-117 nga Civil Service anniversary mao ang paghatag pasidungog sa mga empleyado-awardees nga himoon karong Septyembre 29, 2017.
