Aron mabantayan ang gitagamtam nga kalinaw sa Davao del Norte, gipahigayon na sab ang Peace Dialogue tali sa lokal nga gobyerno, Army, kapolisan uban sa mga Muslim multi-sectoral leaders Martes, Septyembre 26 didto sa DavNor Pavillion, Capitol Complex.  

“As-salāmu ʿalaykum. . . Ang kalamboan dili makab-ot kung walay kalinaw, . . . So it is but timely that we talk today on how to achieve peace, not only for our province since for quite some time there already exist peaceful relations and mutual understanding between Christians and Muslims here in Davao del Norte. Apan bisan pa niana, wala na magpasabot nga mag-relaks ta nga dili nato bantayan ang kalinaw nga atong gitagamtam dinhi sa probinsya,” matod ni Gobernador Anthony del Rosario sa iyang mensahe.

Sa bahin sa kapolisan, gipasiugda ni Police Regional XI Director P/Chief Superintendent Manuel R. Gaerlan ang respeto ug kortesiya ngadto sa usag usa ug magkinabuhi uban sa balaod aron gayod mapatunhay ang kalinaw.

Matod ni OIC National Commission on Muslim Filipinos (NCMF) Regional Director Hadja Norhaida Lumaan nga ang lain-laing relihiyon nagpasiugda sa kalinaw lakip na ang Islam diin ang Muslim adunay katungdanan nga ipasiugda ang kalinaw.

Alang kang Major General Noel S. Clement, Commanding Officer sa 10th Infantry (Agila) Division, kinahanglanon gayod nga ipadayon nga panag-uban ug kolaborasyon tali sa armadong kusog sa Pilipinas ug Muslims aron hiusang batokan ang bisan unsang hulga sa kalinaw ilabina dinhi sa probinsya sa Davao del Norte. 

“Kita mismo nahibalo nga dili tinuod ang gibalita nga gubot ang tibuok Mindanao ilabina dinhi sa Davao del Norte diin ang pagsinabtanay, panaghiusa ug kalinaw ang kanunay natong gipahimuslan. Busa kining himoon nga Peace Dialogue usa ni ka paagi nga mabantayan nato kining sensitibo nga kahimtang. . .

Kini maoy pagsuportar sa administrasyon sa atong mahal nga Presidente, President Rodrigo Roa Duterte. Ako moingon kaninyo nga kini nga administrasyon will continue to provide assistance and support to all existing programs to the Muslim communities. . .Assalamu alaikum wa rahmatullahi wa barakatuh," paniklop nga mensahe ni Gobernador del Rosario nga positibo kaayo sa maayong resulta sa Peace Dialogue.

Ingong apresasyon sa suporta, usa ka “kris” ang gihatag sa mga Muslim leaders ingong regalo ngadto kang Gobernador del Rosario.