Kabahinsa pag-obserbar sa probinsyal nga kagamhanan sa Davao del Norte nga gipangunahan sa Provincial Human Resource Office (PHRMO) ang pagtimaan sa ika-117 nga selebrasyon sa Civil Service pinaagi sa pagpailawom sa 42 ka mga empleyado alang sa 2-ka adlaw nga pagbansay sa Urban Gardening Septyembre 27-28, 2017.

Tumong sa administrasyon ni Gobernador Anthony del Rosario ilawom sa BEST PEOPLE development agenda [ikatulong E---Employment and Livelihood Opportunities nga gitahasan ang Provincial Agriculture Office (PAGRO)] nga padayong mangita ug mosagop sa modernong pamaagi sa panguma dili lamang para sa kinaiyanhong mag-uuma apil na kadtong mga empleyado aron may dugang sa sweldo.

Napili ang Urban Gardening tungod sa limitadong luna nga gipuy-an sa daghang empleyado nga nagpuyo sa syudad.

Gawas sa limpyo, organiko nga pagpadako sa mga gulay, daghang benepisyo pa ang ihatag sa urban gardening ilabina ngadto sa empleyado-gardener nga magdala’g kaayohan sa ekonomiya sa pamilya, food security, panglawas ug bisan sa atong kalikopan (environment).

Ang dali mapadagko nga mga gulay sama sa pechay, lettuce, okra, ampalaya, talong, batong (beans) ug uban pa ang gikahinaman nga itanom sa interesadong empleyado samtang namati pag-ayo sa mga lectures.

Lakip usab nga gihisgotan ang dali ma-harvest nga mushrooms nga molungtad lamang ug 15 ka adlaw gikan sa iyang pagtanom dayon ma-harvest na.

Gitudloan ang mga partisipante gikan sa pag-andam sa yuta ngadto na sa pag-seedling, pag-transplant, pagpatubo ug bisan hangtod na sa pag-harvest. Lakip sab nga gitudlo ang pag-sinati o pag-ila sa mga mananap nga “amigo” sa tanom ilabina ang pagpanalipod ug pagkontrolar batok peste ug dangan nga moatake sa mga gulay. Bisan ang paghimo ug botanical concoction gikan sa mga materyales sa palibot ingong organiko nga fertilizers gitudlo sab.  

Gawas sa bililhong kahibalo, ang matag partisipante nakadawat ug “starter kit” alang sa urban gardening lakip na ang 50-kilos nga bio-organic nga fertilizer alang sa tanom ug ang 16-oras nga Certificate of Participation.

Ang Urban Gardening naglakip sa pagtanom diha sa Container, Raised Bed gardening, water gardening, community ug hydrophonics gardening.


 

More Davnor Updates at

DavNor Karon

 

DavNor News