ARON MALIKAYAN ang disgrasya, gihangyo sa Davao del Norte Provincial Peace and Order Council (PPOC) ang Department of Public Works and Highways (DPWH) lakip na ang Provincial Police Office nga limpyohon ang karsada nga gihimong alternatibong ruta pasulod ug pagawas sa Tagum City.

Tungod sa nagpadayon nga konstruksyon sa sentro sa syudad sa Tagum, ang Capitol Avenue atubangan sa DavNor Kapitolyo gihimong agianan sa mga sakyanan hinungdan sa panagsa nga paghuot sa trapiko. Nadugangan pa gyod kini sa mga balay-balay sa mga nagreklamong mag-uuma atubangan sa opisina sa Department of Agrarian Reform (DAR) nga nakahatag ug peligro ilabina kung mogawas ang mga heavy equipments sa Kapitolyo.

“Dili mi nakikialam anang ilahang activity diha. Ang concerned lang namo is basin naay mahitabo disgrasya hinuon diha sa main gate kay tungod naa diha karon nagaagi amoang heavy equipment. . Dili man lang gud ang DAR ang apektado karon. . Ako na mismo naghangyo basin mahatagan nato ug solusyon,” pahayag ni DavNor Provincial Engineer Raul Mabanglo atol sa PPOC meeting sanglit naglisod ang tag-as nga mga sakyanan sa pagmaniobra pagawas ug pasulod tungod sa gi-okupar nga lugar sa mga nag-picket nga mga mag-uuma.

Walay representante sa DAR atol sa PPOC meeting niadtong Lunes.

Ang Department of Education nga silingan ra sab sa DAR pinaagi ni Dr. Josephine Fadul naghangyo sab sa DPWH nga limpyohon ang kilid-kilid sa karsada hangtod na pagawas sa Canocotan tungod sa mga eskwelahan nga maagian sa re-routing. 

Mismong si Provincial Administrator Samson Sanchez ang nag-mosyon pinaagi ug resolusyon nga hangyoon gayod ang DPWH uban sa pagsuporta sa kapolisan nga limpyohon ang re-routing nga karsada sanglit ang maong agianan propiedad na sa nasyonal nga panggamhanan. 

“I move for the resolution enjoining the DPWH to clear all national highways especially the re-routing routes of any obstruction that will jeopardized not only the flow of traffic but the safety and security of the traffic and the pedestrian from the terminal down to Canocotan area and also the other bypassed and re-routing routes, I so moved Mr. Chairman,” matod ni PA Sanchez nga nagpasaka sab ug laing mosyon alang sa resolusyon sa paghangyo sa kapolisan nga tabangan ang DPWH sa paghimo niini.

Ang duha ka mosyon alang sa resolusyon giuyonan sa tanang mitambong nga nagpasabot nga maapektahan ang mga balay-balay sa mga nag-picket nga mag-uuma atubangan sa DAR.

Si Provincial Vice-Governor Alan Dujali ang nag-preside sa PPOC meeting niadtong Lunes, Enero 8.


 

More Davnor Updates at

DavNor Karon

 

DavNor News