DavNor IOs mipailawom sa “Confidence in Public Speaking” seminar

ARON MOTAAS ang kumpyansa nga moestorya atubangan sa publiko, mipailawom ang mga Information Officers (IOs) gikan sa nagkalain-laing LGUs, polis, army ug ubang national agencies sa Davao del Norte sa usa ka adlaw nga “Confidence in Public Speaking” seminar nga gipasiugdahan sa Information Officers Network (ION) uban sa Philippine Information Agency (PIA) ug Provincial Information Communication and Knowledge Management Office (PICKMO) Martes, Enero 30, didto sa Bulwagan ng Lalawigan DavNor Kapitolyo. 

Kadaghanan sa mga Information Officers ilabina ang gikan sa mga Local Government Units maoy “multi-tasking” IOs nga moatubang sa lain-laing sektor sa katawhan.

“Educational input in having confidence in public speaking. Tips on how to be more confident kay ang mga tawo hadlok man mag-estorya, mas gusto nila mamatay kay sa paestoryahon. Gitan-aw nato kung unsa gyod ang causes nganong mahadlok man ang tao mo-estorya. And all of them, kadaghanan are just in the minds, so gi-boost nato ang ilahang confidence to handle,” matod ni Guest Speaker Ms. Nemalyn Ledda, District Trainer for Mindanao sa Toastmaster International District 75.

Bisan kung dili tanan mga gradwado sa kursong Mass Communications, gidayeg ni Ms. Ledda ang katakos sa mga IOs uban sa dugang sugyot nga aron pa gyod motaas ang kumpyansa sa mga tigpamaba ang dugang seminar makaayo kanila.   

“I think so kay daghan pa man kaayong facets ang presentations. Dili man pod na madala ug kausa lang; continuous, constant practice,” dugang pahayag ni Ms. Ledda nga nagtug-an nga bisan siya padayon gihapon nga nag-praktis bisan kung sobra 18 na ka tuig sa publikong pakig-estorya. 

Alang sa usa ka personahe sa Army nga kabahin sa kalihokang pampubliko, ang usa ka adlaw nga kalihokan dako kaayo ug ikatabang ilabina ang pagtubag sa mga pangutana nga nagkinahanglan ug rason.    

“Daghan ko ug natun-an, kay para sa akoa hina ko ug confidence in public speaking. Naa ko’y natun-an paunsa mag-deliver sa public tapos nag-build ka’g good rapport sa imong mga kauban,” matod ni PFC Michelle Maganaka, miembro sa Public Affairs NCO sa 60IB nga naka-base sa Doña Andrea, Asuncion, Davao del Norte.

Ang mga Information Officers sa DepEd, SSS, DNPPO, CSC, OPP, 60IB, Philhealth, DAR, VGO, NCIP, DOST, NFA, PSA, Comelec, DTI ug LTO nakig-bayloay ug mga opinyon sa mga Municipal Information Officers gikan sa lain-laing LGUs atol sa usa ka adlaw’ng kalihokan.

Gitambongan sab ni PIA XI Regional Director Efren Elbanbuena ang maong kalihokan.


 

More Davnor Updates at

DavNor Karon

 

DavNor News