SA UNANG higayon nakabaton ug legal nga ilhanan ang daghang sakop sa Indigenous People (IP) tungod sa libreng delayed birth registration dala sa BEST PEOPLE Festival of Services didto sa Limbaan, New Corella, Davao del Norte gikan Pebrero 19-23, 2018.

Ang libreng rehistro may usa lamang sa halos usa ka gatos nga serbisyo nga sa panguna maoy alang sa mga lumupyo sa Barangay Limbaan, Cabidianan, Macgum, Sto Niño ug Suawon. Hinuon wala sab pugngi ang gikan sa laing barangay nga magpahimulos sa mga serbisyo.

Gikan sa Barangay Patrocenio ug sakop sa tribong Bagobo, sa edad 23, si Mrs. Letecia dunay duha ka anak. Kinahanglan pa siya nga molakaw paadto sa barangay Cabidianan aron makasakay sa libreng sakyanan padulong sa Barangay Limbaan diin didto ginahimo ang libreng rehistro.

 “Makakuan ko sa akong birth. .  Wala pa jud gikan sa pagkagamay,” matod ni Mrs. Letecia nga prangka mitug-an nga wala pa gyod siya marehistro sukad sa iyang pagkatawo hangtod 23 anyos na.

Mapasalamaton si Mrs. Letecia sa nadawat nga tabang nga misaad nga iyang ingnon ang iyang mga ka-tribo aron sab sila marehistro.    

“Dako gyod kaayo ko ug pasalamat ani nga programaha,” matod ni Mrs. Letecia nga mapahiyomon.  

Si Mrs. Maricris K. Pelaez nga dunay upat ka anak ug 27 anyos na gikan sab sa Barangay Patrocenio nga sakop sa tribong Surigaonon.

“Naa ko naminyo diha. . Salamat kaayo kay naay kuan dire naay late registered, sa kuan sa Caravan Festival,” pasalamat ni Maricris nga ulahi pa nga na-rehistro kay sa iyang mga anak.

Gawas sa libreng delayed birth registration, daghang sakop sa IPs ang nagpahimulos sa ubang mga serbisyo sama sa libreng Kasalan ng Bayan nga gipahinabo hapon sa Pebrero 22. Gawas sa libreng kasal, libre ang tanang gisul-ob sa tanang 43 ka paresan nga malipayong midawat ug mga regalo gikan sa ilang ninong nga si Gobernador Anthony del Rosario ug mga department heads sa Kapitolyo.

Ang sunod nga hugna sa BEST PEOPLE Festival of Services ipahigayon sa Distrito II sa Davao del Norte adto sa Braulio E. Dujali karong Marso 2-7 anha sa Barangay Poblacion.


 

More Davnor Updates at

DavNor Karon

 

DavNor News