DavNor Kapitolyo SAOs gipailawom sa Learning Session

ARON masangkapan sa dugang katakos, gipailawom na sab ang mga Supervising Administrative Officers (SAO) sa DavNor Kapitolyo sa Learning Session sa ‘Winning Insights for Top Performance, AIM High’ Myerkoles, Pebrero 28.

Tibuok adlaw nga gipasiugda ni Mr. Ardy S. Arbello, usa ka de-kalibre nga mamumulong ug international certified speaker ug lead trainer sa Dr. John C. Maxwell Premiere Leadership Workshop ang mga topiko nga “Goal-Driven Performers Do Not Settle for Good”, “Outstanding and Consistent Performance Makes on Stand-out”, “Lead with Positive Influence Always” ug “Daily Discipline Produce Long-term Results.”

Hinuon ang Learning Session wala lamang gi-limite ngadto sa mga Supervising Administrative Officers sanglit ang ubang department heads, chiefs of hospitals, administrative, section heads, ug kadtong dunay salary grade 15 nga mga empleyado miapil sab.

Matod ni Ms. Monica L. Salido, department head sa Provincial Human Resource Office (PHRMO) nga gikinahanglan gayod sa mga empleyado ang propesyonal nga paglambo ug ang pagpauswag pa sa ilang katakos sa pagdumala sa mga empleyado ilawom kanila.  

Dugang pahayag sa PHRMO department head nga ang pagdumala ug mga empleyado dili sayon hinungdan nga angay lamang nga sa pupanahon ipailawom ang mga superbisor sa mga Learning Interventions aron molambo ang iyang pagkatawo mismo, iyang trabaho nga moresulta sa kalamboan sa katibuk-an sa organisasyon.

Sa letrang “T” ilawom sa BEST PEOPLE development agenda ni Gobernador Anthony del Rosario nga nagkahulogan ug “Transformative leadership”, katuyoan gayod sa iyang administrasyon nga masangkapan ilabina ang mga department heads ug superbisor sa dugang kahibalo ug katakos alang sa epektibong pagdumala aron makahatod sa eksaktong serbisyo ngadto sa publiko.

Bisan kung ang resulta makita pipila ka bulan human sa mga learning sessions, apan masaligon kaayo ang PHRMO department head nga mas pa nga mouswag ang mga superbisor bisan pa man kung sa kasamtangan gihuptan na sa Davao del Norte ang taas nga marka sa “score card.”

Dugang gipasabot ni Ms. Salido nga ang taas nga marka maoy tungod sa suod nga pagsuportar sa mga superbisor ngadto sa mga department heads.


 

More Davnor Updates at

DavNor Karon

 

DavNor News