NATIN-AW ang mga kalibog sa daghang mag-uuma labot sa reklamo sa buluhisan sa ilang mga propiedad atol sa Information Education Campaign on Real Property Taxes kagahapon, Lunes, Marso 5, sa nagpadayong BEST PEOPLE Festival of Services didto sa Braulio E. Dujali.

Nga gihatagan ug 15 diyas aron mabayaran ang ilang amoroso (unpaid) nga buhisanan, gipasibaw sa usa ka tag-iya ang ilang kabalaka basin unya malakip sa subasta (auction sale) ang ilang 7 ka ektarya nga luna. Mipasalig si Davao del Norte Provincial Treasurer Ms. Regina Ricafort nga dili kini maapil kung mohimo lamang ug aksyon ang tag-iya sama sa pasiunang bayad. Ang “solusyon” gikalipay kaayo sa tag-iya sanglit wala silay dakong kantidad nga ibayad sa katibuk-ang buhis.   

Laing tag-iya sab ug yuta uban sa iyang bayaw, mipasibaw sa ilang reklamo nga unta menosan ang ilang buluhisan sanglit ang upat ka ektarya nila nga basakan daghang tuig na nga nakuhaan ug 3,000 metros kwadrados tungod sa kanal-patubig nga gitadlas sa ilang luna. Dihadiha nga gitambagan sa mga personahe sa Provincial Treasurers’ Office nga moadto sa Municipal Assessor’s Office aron mamenosan ang bayronon.

Ang mga tag-iya ug yuta nga nanambong sa forum nalipay nga nasabtan kung unsa ang angay’ng buhaton ilabina kadtong wala kabayad ug buhis sulod sa dugay’ng panahon.

Gawas sa impormasyon ug edukasyon nga gipaabot sa PTO, kauban usab nila ang lokal nga kawani sa Municipal Treasurer’s Office sa B.E. Dujali nga midawat sa bayad niadtong mobayad ug buhis.    

Ingong pag-ila sa ilang pagka-andam motuman sa obligasyon, nanghatag ang PTO ug tasa (coffee mugs) ingon nagpa-raffle ug mga household items.

Sa pagbukas sa BEST PEOPLE caravan services niadtong Byernes, Marso 2, gipasiugda ni Gobernador Anthony del Rosario nga ang buhis sa katawhan angay gayod suklian ug serbisyo nga naglakip sa paghatag ug saktong edukasyon ug impormasyon kanila.

“Dili namo ni kwarta ang gigamit sa ingon ani nga programa, proyekto ug serbisyo. Hinumdomi dili namo ni kwarta, inyo ning kwarta pinaagi sa inyong pagbayad ug buhis. Ug sakto lang nga ibalik namo ning kwartaha kaninyo pinaagi sa mga maayong programa ug proyekto. . Bisan ang atong Presidente Rodrigo Roa Duterte miingon nga kinahanglan ibalik sa katawhan ang buhis nga ilang gibayad pinaagi sa mga maayong programa ug proyekto.


 

More Davnor Updates at

DavNor Karon