DUNGAN nga nagpakasal ang amahan ug anak atol sa Kasalan ng Bayan dala sa BEST PEOPLE Festival of Services didto sa Braulio E. Dujali kagahapon, Myerkoles, Marso 7, 2018.

Si Recaredo Gervacio, 67 anyos ug usa sa iyang anak nga mag 48 anyos, dungan nagpakasal aron ma-legitimate ang ilang panagtipon uban sa ilang mga asawa.

Matod sa asawa ni Recaredo nga si Teresita, 64 anyos, nga nagpakasal sila sa Huwes niadtong Nobyembre 24, 1969 apan wala kini sa record sa National Statistics Office (NSO) hinungdan nga gusto nilang makabaton ug legal nga dokumento sa kasal tungod kanunay silang pangitaan niini ilabina nga 13 ka buok ilang anak.     

“Pagtan-aw nako sa NSO wala, wala ko’y nakita nga record. . Gusto gyod ko pakasal kay bisan hain ko paingon pangayoan man ko’g marriage. Magpadala ko, pangayoan ug marriage. Mag-follow-up ko sa akong mga benefits, marriage man gihapon ang gipangita. Mao na nga napugos gyod ko ug pakasal bisag nakasal na ko,” pagklaro ni Mrs. Teresita nga gikahimuot ni Gobernador Anthony del Rosario, mga department heads, Mayor Leah Marie Moral-Romano ug ubang opisyales ug sa daghang mitambong.

Sa bahin sa iyang anak nga si Gilbert, ‘underage’ pa kini nga nagminyo hinungdan nga wala kini gikasal. Tungod sa libreng Kasalan ng Bayan, midesisyon dayon kini uban sa iyang asawa sanglit aduna na sab sila’y mga anak.

Todo pasalamat si Braulio E. Dujali Mayor Moral-Romano tungod sa dulot-kasingkasing nga mga serbisyo nga gidala sa ilang lungsod ilabina ang libreng Kasalan ng Bayan.     

“Festival of Services the most comprehensive, complete, naa na tanan nga mga serbisyo. Bisan ako lipay kaayo isip inahan sa lungsod kay naa ba’y Kasalan ng Bayan nga di na ka mag-gasto sa LGU. Na-save nato atoang budget kay kompleto na nga gihatag ni Governor,” matod ni Mayor Leah Moral-Romano nga nag-detalye sa libreng sinina sa mga bana, make-up, cake, wine, gown para sa mga babae, ug bisan ang pag-proseso sa Kasalan lakip na ang daghang regalo nga gidawat sa tanang gikasal.   

“First time nako nga naka-testing ug nakakita nga Festival of Services nga ing-ani kaduol, ing-ani kadulot sa tagipusoon nga gipadala ni Governor ang mga government services ngadto sa dughan sa katawhan sa Braulio E. Dujali. Akoa gyod nabatyagan ang AMA, Abilidad at Malasakit sa atong pinalanggang amahan sa probinsya. And I hope next year naa gihapon ang Festival of Services,” matod sa B.E. Dujali Mayor nga nanghinaut sa mahibalik pagka sunod tuig ang BEST PEOPLE Festival of Services.


 

More Davnor Updates at

DavNor Karon