Gob AGR miapela: “Ayaw biyai inyong mga anak”

MIAPELA si Gobernador Anthony del Rosario atubangan sa 47 ka magtiayon nga gikasal nga dili gayod biyaan ang mga anak pananglit moabot ang panahon nga dili kapugngan magbulag ang bana ug asawa atol sa Kasalan ng Bayan, Myerkoles, Marso 7, 2018.

Hinuon gipasabot sa gobernador nga kinahanglan nga ang panagbulag mao na gyod ang kataposang solusyon.

“Ang recommendation nako nga paningkamotan gyod ninyo nga dili gyod magbulag kay luoy kaayo ang mga bata. .Sila ang masakripisyo. Dako gyod ang negatibo nga mahitabo sa imong anak basta gani magbulag mo mag-asawa. . Ang mga anak maapektohan gyod,” pasabot sa gobernador.

Apan kung pananglit dili gyod mosaler ang mga solusyon aron magpadayon ang panagtipon, mihangyo ang gobernador nga dili gyod biyaan ang mga bata kay sila ang apektado kaayo.  

“Pero naa man gyod uban nga bisan unsaon nimo dili gyod magkauyon,. . kini ang akong abiso sa inyoha: Kung moabot gyod ang panahon nga di na gyod makaya . .bisag daghan nang nahitabo magkauliay mo wa lang gihapon, unya magbulag gyod, ang hangyo lang nako sa inyoha ayaw gyod biyai ang inyong mga anak,” apela ni Gob AGR kinsa miagi sa maong eksperyensya.

Apan dugang gipasidaan ni Gob AGR nga sa dihang makakita na ug lain ang nagbulag, dili angay’ng kalimtan sa ginikanan ang mga anak ug palabihon na lang ang bag-ong partner. Ug kun pananglit moabot gyod ang higayon nga kinahanglang mamili tali sa anak ug bag-ong uyab, angay nga pilion niini ang mga anak mismo ug dili isakripisyo ang ilang kaugmaon tungod lang sa babae. 

“Okey lang ma-in-love pero do not ever forget your children. . Kay kami man gud sa gobyerno makasulti gyod nga kasagaran sa bata nga naay problema kanang nag-apil-apil ug gang, kadtong nagdroga-droga, wala kahuman ug eskwela, gikan gyod na sa broken family,” padayong pasabot ni Gob AGR.

Apan bisan pa sa iyang naagian, pabor gyod kaayo ang Gobernador nga molungtad ang panagtipon sa bana ug asawa nga nanghinaut na kini mahimong “forever.”

“Kung ako ang pangutan-on ninyo, ayaw gyod pagbulag. . Sa katapusan ako naga-ampo ug naga-panghinaut nga hatagan pa kamo ug daghang grasya sa Ginoo aron ang inyong kaminyoon magmalig-on, malipayon nga puno sa respeto ug gugma. Hinaut, hinaut makaabot pa mo sa forever,” panghinaut sa gobernador.

Susama sa nahitabo didto sa Limbaan, New Corella, ang ikaduhang hugna libreng Kasalan ng Bayan sa Braulio E. Dujali nga hatod sa BEST PEOPLE Festival of Services, si Gob AGR ang principal “ninong sa 47 ka magtiayon kauban ang mga DavNor Kapitolyo department heads.


 

More Davnor Updates at

DavNor Karon

 

DavNor News