PRAYORIDAD ug gitutokan gayod sa kasamtangang administrasyon sa Davao del Norte ang pag-atiman ug pagpasig-uli sa naguba nga kinaiyahan (environment).

Kahinumduman nga balik sa mga dekada 70’s,  80’s ug bisan sa sayong bahin sa 1990’s naupaw ang mga kalasangan sa probinsya tungod sa operasyon sa logging.

“Sa kasamtangang administrasyon ni Gobernador Anthony del Rosario nabutang gyod ta sa priority. Sa BEST PEOPLE . . ang “B” niana nagpasabot ug “Balanced Ecology.” Ang buot ipasabot dako gayod ang gugma sa gobernador kay apil man ang environment sa priority sa administrasyon; buot ipasabot balanse nga dili lang bahin sa ekonomiya kundili bahin sab sa kinaiyahan,” matod ni Provincial Environment Natural Resource Office (PENRO) department head Romulo Tagalo nga nagpasabot sa natural resourced-based nga ekonomiya atol sa programang “DavNor Sayron Ta” Byernes, Marso 9.

Ang Davao del Norte adunay gidak-on nga 346,280 ektaryas diin 48% niini maoy timberland. Sa 48% nga timberland, 61% sab niini kun sobra 101,390 ektaryas ang kinahanglang tamnan pag-usab ug mga kahoy sanglit upaw na.

Dugang gibutyag sa PENRO department head nga ang makaya lang sa PENRO nga tamnan matag tuig maoy .042% kun sobra 425 ektaryas lang tungod sa kalimitado sa pondo. Sa nahibilin nga mga kahoy wala usab kini matapok hinuon nakatag sa tibuok Davao del Norte ug nagkinahanglan 55 ka tuig aron matamnan pag-usab ang naupaw nga mga kalasangan.

Sa nahuman na nga duha ka hugna sa BEST PEOPLE Festival of Services didto sa Limbaan, New Corella ug Braulio E. Dujali ang PENRO naghimo ug kampanya-edukasyon, nag-identify ug school ug barangay sites aron matamnan ug mga kahoy nga himoong “Tree Park.”

Ug dili kutob lang sa pagtanom. Giseguro sab sa PENRO nga adunay mag-atiman sa gitanom nga mga kahoy sanglit ang unang unom (6) ka bulan maoy kritikal kaayo alang sa bag-ong gitisok nga kahoy.

Gawas sa padayong pagpasig-uli (reforestation) sa naupaw nga kalasangan, ang DavNor PENRO padayon sab nga nananom ug mga kahoy nga lawom ug mga gamot lakip na ang kawayan diha sa mga daplin sa kasubaan aron mapugngan ang padayon nga pagkan-kan (erosion) sa yuta ilabina panahon sa ting-baha.

Gitutokan sab sa PENRO ang pagkontrolar sa pag-quarry sa graba sulod sa probinsya uban sa pakig-alayon sa lokal nga LGU diin nahimutang ang mga quarry sites tungod sa kusog nga pagpanukod ug imprastruktura agig sanong sa Build, Build, Build nga programa ni Presidente Rodgrigo Roa Duterte.


 

More Davnor Updates at

DavNor Karon

 

DavNor News