Barangay opisyales gitapok alang sa RPT administrasyon

SA IKADUHANG hugna, naghiusa ang DavNor PTO, PASSO ug PLO sa pakigtambayayong sa mga tesorero ug assessors sa munisipyo sa pagtapok sa mga kapitanes, chairperson sa committee on ways and means ug tesorero sa barangay aron hisgotan ang “Strengthening Local Governance on Real Property Tax Administration” Huwebes, Marso 22.

Tumong sa naghiusang departamento sa DavNor Kapitolyo nga mapakusog ang koleksyon sa buluhisan (Real Property Taxes) aron malikayan nga maapil sa subasta (public auction) ang delingkwente nga mga kabtangan ug labaw sa tanan magamit sa mga barangay ang ilang “share” diha sa pangkalamboan nga proyekto.

Ang barangay Poblacion sa New Corella ug Alejal sa Carmen adunay dagkong delingkwente nga kolektahonon nga sobra P1.2 milyon lakip na ang 2018 nga buhis.   

“Ang atong pamaagi kabahin sa pagpangolekta ug RPT, ato gyod na kanunay nga ginaadto ang mga purok. Unya ang mga landowner atong ginapasabot nga ang atong provincial government mo-conduct gyod ug public auction. Ang barangay Poblacion usa gyod nga nasampolan sa public auction. .  napulo ka lote ang naibaligya ngadto sa publiko tungod sa dugay na nga way bayad sa buluhisan,” matod ni Kapitan Rodolfo Comidoy sa Barangay Poblacion New Corella.

Dugang sa Kapitan nga regular ang iyang pagbisita sa mga purok uban sa pagkombinsi sa mga tag-iya nga bayaran gyod ang ilang mehorasan.

“Miadto gyod ko sa mga purok ug akong gi-convince ang mga landowner nga mamayad ta ug mehoras kay kining inyong gibayad mobalik pod ni nato in terms of projects. Ug unsay inyong gipangayo sa gobyerno mahatagan ta kay namayad pod mo ug buhis. Kada bulan nag-adto gyod ko sa purok ug usa nga gihisgotan nato ang kabahin sa pagbayad ug mehoras,” pagtug-an ni Kapitan Comidoy sa inisyatibo nga ilang gihimo.

Ang Kapitan sa Brgy Alejal, Carmen andam sab nga molibot sa iyang barangay aron dasigon ang mga tag-iya ug yuta uban sa panghinaut nga unta mahatagan ug atensyon ang karsada sa ilang lugar kay dagko na kaayo ang mga lubak.

“Makita nako didto sa Assessors’ munisipyo sa Carmen kinsa tong mga tao nga naay mga dako nga bayronon ako gyong pag-adtoon sila para idasig sa ilaha ang pagbayad sa tax. .Isip kapitan, nangandoy nga ang provincial road, manghinaut unta nga tagaan pod ug maayong pagtagad at least man lang kami nga mga barangay captain dili mi maulaw pagpaningil sa mga taxes sa katawhan. Alang lamang na sa kaayohan sa tanan ug manghinaut ko nga ipaabot nako ni kang Gob tungod kay dako kaayong problema ang among mga kalsadahan karon tungod sa dagko kaayo nga mga lubak-lubak,” pagklaro ni Kapitan Liza D. Aldran sa tinuod nga kahimtang sa mga karsada sa ilang lugar. 

Gawas nga malikayan ang public auction, penalties ug mga surcharges, obligasyon gayod sa usa ka lungsoranon ang pagbayad sa buluhisan ngadto sa kagamhanan. Ug aron dugang madasig ang mga taxpayers, gawas sa mga discount sa sayong pagbayad, nagpasiugda ang Provincial Treasurer’s Office ug insentibo pinaagi sa paghatag ug mga computers ug printers ngadto sa mga barangay sa tanang makakab-ot sa ilahang target gawas sa refrigerator alang sa highest collection efficiency.


 

More Davnor Updates at

DavNor Karon

 

DavNor News