DavNor PDRRMC mipailawom sa 2018 Gawad Kalasag search

MIPAILAWOM sa makuti nga pagbusisi sa mga rekords, kagamitan ug mga pamaagi ang Davao del Norte Provincial Disaster Risk Reduction Management Council (PDRRMC) alang sa Search for 2018 Gawad Kalasag kagahapon, Myerkoles, Abril 11.

Bisan kung naka “grand slam” Regional Winner na ang DavNor PDRRMC (2015, 2016 2017), matod ni Provincial Administrator ug PDRRMC Executive Officer Samson Sanchez nga padayon niini nga gipauswag ang kalidad ug kapabilidad dili lamang sa mga tig-responde kundili lakip na niini ang mga kagamitan.

“Aduna ta’y mga gidugang especially the passage of LCCAP, Local Climate Change Action Plan, and then Public Address System Early Warning on-going ang installation, ug ang ikatulo kaning atoang activation sa 911 in addition sa prevailing 4 phases nato sa thematic areas for our bid to become the regional winner for the 2018 Search for Regional Kalasag Award,” matod ni PDRRMC Executive Officer Sanchez.

Sa miaging semana lang gipahimutang na ang usa sa tulo ka mga Emergency Mass Warning System didto sa Liboganon River dam sa Kapalong ug andam na kini nga mohatag ug pahimangno pinaagi sa makusog nga tingog sa siren hangtod sa gilay-ong tulo ka kilometros alang sa pag-alerto ug pagbakwit.

Matod ni Ms. Rebecca O. Lopez chairperson sa Regional Selection Committee gikan sa Office of Civil Defense (OCD) XI nga dunay upat ka hinungdanong thematic areas diha sa 14 ka kategoriya nga konsiderahon sa pagpili sa mga entries aron ilhon nga Gawad Kalasag awardee nga himoon sa duha ka hugna (phases). 

“Thematic areas nato upat focusing Preparedness, Prevention and Mitigation, Response, Recovery and Rehabilitation. So ang atong Regional Selection Committee member sila sa council sa Regional Disaster Risk Reduction Management Council nagsunod ta sa mandato sa new guidelines,” matod ni Ms. Lopez.       

Tungod sa padayong paningkamot nga mapakusog ang DavNor PDRRMC, malaumon si PA Sanchez nga masungkit gihapon sa DavNor ang 2018 Gawad Kalasag award.    

“Para nako I think still we can get the regional award for 2018 for the Kalasag Search considering wala man ta’y hunong sa pag-improve sa atong sistema because we have funds available for improving for disaster preparedness activities,” pahayag sa PDRRMC Executive Officer.

Sa miaging bulan sa Marso 2018, ang DavNor 911 Emergency mahimo na sab nga tawagan gamit ang Globe ug TM nga linya sa telepono. Kasamtangan nga gi-proseso na sab ang pag-apil sa Smart nga linya.


 

More Davnor Updates at

DavNor Karon

 

DavNor News