GIPALANOG na sab ang mga pahamangno nga angay’ng masayran sa publiko labot sa HIV-AIDS agi ug pagtimaan sa bulan sa Abril ingong HIV-AIDS Awareness campaign month.

Pinaagi sa senemanang Kapihan sa Kapitolyo Huwebes, Abril 12, nagtambayayong ang Davao del Norte Provincial Health Office ug Tagum City Health Office sa pagpaabot sa mga pahamangno labot sa makamatay’ng sakit nga Acquired Immuno-Deficiency Syndrome kun AIDS nga dala sa HIV nga virus.

“Ang HIV-AIDS dugay na siya nga topic pero ang nahimong problema ani ang pagsabot sa mga katawhan nga medyo kulang. Isa sa mga factor niini medyo kulang ang pag-educate sa mga tao. Isa na pod seguro nga kulang ang interest sa atong society nga kabalo sila existing ang sakit pero everybody is feeling nga dili sila apektado ana; mga hindrance nga maglisod ta ug pasabot,”matod ni Tagum City Health Officer Dr. Arnel Florendo kung nganong kinahanglang ibalik-balik ang pahimangno ngadto sa publiko.

Matod sa Tagum City Health Officer nga ang usa ka tawo matakboyan sa Human Immuno Virus (HIV) pinaagi sa pakigsekso, pag-abono ug dugo, gatas sa inahan ug vaginal secretion sa usa ka babaye. Iyang giklaro hinuon nga ang pakigsekso mao gayod ang dakong hinungdan sa pagkuyanap sa sakit diin 99% “sexually transmitted” lalaki nakigsekso sa lalaki [Male Sex Male (MSM]. Ang maong kagaw (virus) magpaluya sa Immune System sa tawo hinungdan sa pagkasakit.

Sanglit wala pa’y namatud-ang epektibong tambal sa HIV-AIDS, giklaro ni Dr. Florendo nga angay gayod mag-ABCD ang usa ka tawo.

“Amoang gina-campaign aron dili magka HIV mao ning ABCD. Ang “A” among gina-push labi na sa mga kabatan-onan-- sexual Abstinence. Kung bata ka pa Abstinence gyod, remain a virgin until such time nga ready ka na mag-asawa. “B”- Be mutually faithful. Among gina-push karon nga ang relationship nga asawa, asawa lang, walay laing partner. Ang “C” amo ning gina-push adtong di na gyod kapugong. Bigaon man gyod ka, ing-ana man imong ginabuhat, please use Condom. “D” do not inject drugs,” pintok nga pasidaan ni Dr. Florendo nga angay gayod sundon ang A ug B aron seguradong dili gyod mataptan sa HIV nga mohatod ngadto sa AIDS.

Agi ug pagtabang ilabina niadtong nagduda sa ilang kahimtang tungod sa mahilayon nga pagkinabuhi, matod ni Dr. Florendo nga angayan silang magpa-testing sa HIV sanglit libre kini ug pabilin nga “highly confidential” ang impormasyon.

Giklaro sab sa Tagum City Health Officer nga ang HIV-AIDS Awareness Campaign gihimo dili lang matag Abril kundili matag adlaw sa tibuok tuig.


 

More Davnor Updates at

DavNor Karon

 

DavNor News