Mga padula sa Lumad ipakita sa DavNor, PSC

NAGTINABANGAY ang probinsyal nga panggamhanan sa Davao del Norte ug Philippine Sports Commission (PSC) nga sa unang higayon maipakita sa publiko ang mga dula nga ginahimo sa katawhang Lumad (Indigenous People) karong Abril 26-28, 2018 diha sa Davao del Norte Sports Complex.

Katuyoan sa administrasyon ni Gobernador Anthony del Rosario nga mahatagan ug pag-ila ang mga sakop sa IP nga komunidad ingong kabahin sa probinsya bisan ang ilang mga padula ingong tipik sa Lumadnong kultura ug tradisyon.

Kauban ang 11 ka lain-laing IP council sa 11 ka mga LGUs sa Davao del Norte, tumong usab niini nga masabtan ilabina sa mga batan-ong IPs nga ang mga padula maoy importanteng bahin sa ilang paglungtad ingong mga lumulupyo sa probinsya.     

“Mao gyod ni ang pinakauna although naa ta’y ginagmay sa lain-lain nga mga munisipyo pero as province-wide, taas nga proseso, eventually nakab-ot gyod nato nga ready na ta,” pasabot ni Provincial Sports and Youth Development Office (PSYDO) department head Giovanni Gulanes atol sa Kapihan sa Kapitolyo, kagahapon, Huwebes nga sulod sa dugay’ng panahon natuman ra gyod ang IP Games.

“Ang pinakarason niini tungod kay ang atong governor karon mihatag gyod siya ug importansya sa kalamboan sa Lumad; usa ka pagrekognisar sa integridad ug identity sa mga Lumad; malangkobon nga socio-cultural, socio-economic ug pangabuhian. Ikaduha, nga dako ang role sa mga Lumad sa Davao del Norte diin ang mga Lumad makasalmot sa gimbuhaton pangkalamboan, nga sila kabahin sa pagbugtaw sa kalamboan sa Davao del Norte,” matod ni Provincial Tribal Chieftain Datu Nestor Mansinaring nga mibating dungog nila nga giila ang ilang kontribusyon sa kasamtangang adminstrasyon.

Gitawag “Pabal’long ng mga Tipanud” (Indigenous People Games), ang mga pamaagi sa panagtigi sa dula naplastar na nga ang 11 ka mga IP representatives sa matag munisipyo ug syudad sa Davao del Norte magsilbing “referees.”

Ang pondo ingon man ang premyo gikan sa probinsyal nga panggamhanan ug PSC.

Ang Davao del Norte adunay 7 ka dagkong mga tribu nga gilangkoban sa Mandaya, Mansaka, Kalagan, Sama, Dibabawon, Mangguangan ug Ata-Manobo nga magtigi sa labing menos 8 ka padula nga Busog (archery), Bangkaw (javelin), Botong (tug-of-war), Lubok (rice pounding), Basket sa Likod (basketball), Dagan (marathon), Kadang sa Kakaw ug Sag-ub (getting water thru bamboo tube).


 

More Davnor Updates at

DavNor Karon

 

DavNor News